Shtime, 25 nëntor 2025- Në ambientet e Shtëpisë së Kulturës u shfaq sot premiera e dramës shkollore “Flamur n’Stuhi”, një shfaqje kjo e përgatitur me kujdes nga prof. Florie Jahiri Ademaj dhe prof. Skender Asllani, dhe me koreografi të realizuar nga prof. Selatin Rizani.
Shfaqja u ndoq nga një numër i madh pjesëmarrësish, mes tyre edhe zyrtarë komunalë, Lulzim Sahiti, shef i sektorit të arsimit, Tringa Xhelili, zyrtare në DKA, dhe Labinot Rexha, drejtor i IAAP Shtime.
Nxënësit e IAAP Shtime interpretuan me përkushtim të madh, duke sjellë para publikut emocione të fuqishme dhe momente që u pritën me duartrokitje të gjata.
Shfaqja trajtoi një prej kapitujve më të rëndësishëm të historisë sonë, festat e Nëntorit dhe epokën e lavdishme të Ushtrisë Çlirimtare të Kosovës, duke e shndërruar skenën në një udhëtim përmes ndjenjave, sakrificës dhe krenarisë kombëtare.
