Shtime, 21 janar 2025- Është përuruar sot salla e edukatës fizike në shkollën fillore “Idriz Ajeti” në fshatin Pjetërshticë, një projekt që shënon një hap të rëndësishëm për përmirësimin e infrastrukturës arsimore dhe sportive në Komunën e Shtimes.
Në këtë ngjarje të rëndësishme ishin të pranishëm Kryetari i Komunës së Shtimes, Qemajl Aliu, Ministrja e Arsimit, Shkencës, Teknologjisë dhe Inovacionit, Arbërie Nagavci, Nënkryetari i Komunës, Faruk Beqa, Drejtoresha e Arsimit në Komunën e Shtimes, Yllka Fejzullahu, si dhe bashkëpunëtorë të tjerë, qytetarë dhe përfaqësues të shkollës.
Kryetari i Komunës, Qemajl Aliu, theksoi rëndësinë e këtij projekti për gjeneratat e reja.
“Kënaqësi e madhe që sot bashkë me Ministren Nagavci dhe deputetin Avni Dehari inauguruam sallën sportive të shkollës së mesme të ulët ‘Idriz Ajeti’. Ky projekt është dëshmi e angazhimit tonë për të investuar në infrastrukturën arsimore dhe sportive, duke siguruar kushte më të mira për fëmijët tanë”, tha Aliu.
Ndërsa Ministrja Nagavci vlerësoi këtë projekt si pjesë të përkushtimit të MASHTI-it, për zhvillimin e infrastrukturës arsimore.
“Bashkë me Kryetarin e Shtimes, Qemajl Aliu, përuruam sot sallën e sportit në shkollën ‘Idriz Ajeti’. Ky është një nga tri projektet e rëndësishme infrastrukturore në këtë komunë, me një total investimesh prej 4,533,881.20 euro gjatë këtij mandati”, tha Nagavci.
Salla e sportit, me një sipërfaqe prej 700 metrash katrorë dhe një vlerë prej 255,404.19 euro, është financuar nga Ministria e Arsimit, Shkencës, Teknologjisë dhe Inovacionit.
Falë këtij projekti, nxënësit e shkollës fillore “Idriz Ajeti” do të kenë mundësi të zhvillojnë talentet e tyre sportive në një mjedis modern dhe të sigurt.
