Shtime, 27 mars 2025- Komuna e Shtimes sot shënoi një moment historik në fushën e kulturës me themelimin e korit të parë të qytetit. Kjo nismë e re jo vetëm që do të pasuron jetën artistike të komunës sonë, por edhe dëshmon përkushtimin ndaj zhvillimit dhe promovimit të kulturës e muzikës.
Me këtë rast, kryetari i Komunës së Shtimes, Qemajl Aliu, së bashku me Drejtoreshën për Kulturë, Rini dhe Sport, Albana Fazliu, pritën profesor Besnik Brahimin, themeluesin dhe udhëheqësin e këtij kori, si dhe anëtarët e parë të korit, të cilët tashmë janë pjesë e këtij rrugëtimi artistik.
“Ky është një hap i rëndësishëm për kulturën e Shtimes. Me këtë kor, ne jo vetëm që krijojmë mundësi për talentet e reja, por edhe forcojmë identitetin tonë kulturor. Zëri i këtij kori do të jehojë në skenat tona, në eventet që do të organizojmë, duke i dhënë një dimension të ri jetës artistike në komunën tonë.
Ky është vetëm fillimi i një rruge të gjatë drejt promovimit të vlerave tona artistike dhe muzikore. Urime të gjithëve për themelimin e Korit të Komunës së Shtimes”, tha kryetari Aliu, duke shtuar se ky kor do të jetë një urë që lidh brezat dhe një forcë frymëzuese për të gjithë dashamirët e artit.
Ky moment shënon një hap të ri dhe të rëndësishëm për kulturën e Shtimes, duke i dhënë zë dhe shpirt qytetit përmes muzikës, gjithashtu me themelimin e Korit të Komunës së Shtimes, pritet që të krijohen mundësi të reja për talentet e rinj, por edhe forcim i identitetit artistik.
