Shtime, 5 qershor 2025 — Kryetari i Komunës së Shtimes, Qemajl Aliu, dhe drejtoresha e Organizatës Kosovare për Talent dhe Arsim “Toka”, Hatixhe Zeka-Konjufca, kanë nënshkruar sot një memorandum bashkëpunimi që synon fuqizimin dhe edukimin e të rinjve në këtë komunë.
Ky bashkëpunim ka për qëllim zhvillimin dhe zbatimin e programeve të përbashkëta që promovojnë cilësinë në edukim, vullnetarizmin, pjesëmarrjen aktive të të rinjve në jetën publike si dhe ngritjen e kapaciteteve të tyre qytetare.
“Ky memorandum është një hap konkret drejt krijimit të një mjedisi ku të rinjtë tanë ndihen të vlerësuar, të mbështetur dhe të fuqizuar për të qenë faktor ndryshimi në komunitetin tonë”, tha kryetari Aliu.
Organizata “Toka”, e cila ka kontribuar ndër vite në fuqizimin e të rinjve në mbarë vendin, do të sjellë përvojën dhe qasjen e saj të suksesshme në Shtime, duke e bërë këtë partneritet një mundësi reale për ndikim pozitiv në jetën e të rinjëve.
