Shtime 5 qershor 2025- Në një ceremoni të mbushur me ndjenja respekti dhe krenarie, sot u shënua 80 vjetori i themelimit të Shkollës Fillore “Hasan Prishtina” në Godanc, një prej shtyllave të arsimit në Komunën e Shtimes.
Të pranishëm në këtë ngjarje ishin kryetari i Komunës së Shtimes, Qemajl Aliu, së bashku me bashkëpunëtorë si dhe përfaqësues të institucioneve arsimore.
Një moment i veçantë që i dha thellësi simbolike kësaj dite ishte prania e Mehmet Prishtinës, nipit të heroit kombëtar Hasan Prishtina. Krahas tyre, në ceremoni morën pjesë edhe nxënës, mësimdhënës, prindër e qytetarë.
Kryetari i Komunës, Qemajl Aliu, e vlerësoi thellësisht simbolikën e këtij jubileu.
“E veçantë e kësaj dite ishte edhe prania e Mehmet Prishtinës, nipit të Hasan Prishtinës, që e bëri edhe më domethënës kujtimin për këtë emër të madh të historisë sonë dhe lidhjen shpirtërore që ajo bart me këtë shkollë”, tha kryetari Aliu, duke shprehur mirënjohje për të gjitha gjeneratat që kanë kontribuar në arsimimin e brezave.
“U ndjeva edhe më i motivuar të vazhdojmë përkrahjen për arsimin, sepse vetëm përmes dijes e kujtesës e ndërtojmë të ardhmen që si shoqëri e meritojmë”, tha kryetari Aliu.
Ngjarja u begatua edhe me një program festiv të përgatitur nga nxënësit e shkollës, të cilët përmes këngëve, recitimeve dhe paraqitjeve artistike sollën në skenë vlerat arsimore dhe historike që kjo shkollë ka kultivuar ndër vite.
Ky përvjetor jubilar nuk ishte vetëm një ditë feste, por një akt simbolik nderimi për trashëgiminë arsimore dhe kombëtare që Shkolla “Hasan Prishtina” në fshatin Godanc bart për 80 vjet me radhë.
