Shtime, 11 qershor 2025- Ka filluar sot faza e dytë e ndërtimit të kanaleve kulluese, një projekt kapital me vlerë mbi 498 mijë euro.
Ceremonia e vendosjes së gurthemelit u mbajt në fshatin Godanc, ku morën pjesë ministri i Bujqësisë, Pylltarisë dhe Zhvillimit Rural, Faton Peci, dhe kryetari i Komunës së Shtimes, Qemajl Aliu së bashku me bashkëpuntorë.
Me këtë rast, ministri Faton Peci, tha se rëndësia e këtij projekti nuk është vetëm për bujqësinë, por edhe për përmirësimin e cilësisë së jetës së qytetarëve dhe mbrojtjen e mjedisit.
“Preokupimi dhe angazhimi ynë nuk ka qenë vetëm përkrahje direkte për fermerët, por njëkohësisht edhe rritja e bashkëpunimit me komunat. E një prej komunave që është treguar shumë bashkëpunuese, proaktive dhe aktive me kërkesa dhe projekte të qarta ka qenë komuna e Shtimes. Sot po fillojmë vazhdimin e fazës së dytë të një projekti që do të lehtësojë jetën e qytetarëve, do të parandalojë çështjen e vërshimeve, për shkak të dëmeve që shkaktohen në bujqësi, por që trajton edhe aspektin ambiental”, tha ministri Faton Peci.
Ndërsa kryetari Qemajl Aliu e konsideroi këtë projekt si një nga më të rëndësishmit për komunën dhe jetesën e banorëve të saj.
“Me ministrin Faton Peci vendosëm gurthemelin e fazës së dytë të një projekti shumë të rëndësishëm për fermerët tanë, ndërtimin e kanaleve kulluese në fshatin Godanc. Me 3 kilometra të reja kanale, do të mbulojmë 25 hektarë tokë bujqësore, duke zgjidhur një nevojë të kahershme për ujitje dhe kullim në këtë zonë. Këto kanale do të ndihmojnë për rendimente më të larta, të ardhura më të mira dhe një jetë më të qëndrueshme për familjet që jetojnë nga bujqësia”, tha kryetari Aliu.
Kjo fazë e dytë përfshin ndërtimin e 3 kilometrave kanale kulluese, të cilat do të përfshijnë 25 hektarë tokë bujqësore, duke adresuar një problem të kahershëm të fushave të përmbytura nga ujërat atmosferike, sidomos gjatë stinëve të pranverës dhe vjeshtës. Ky investim vjen si vazhdimësi e fazës së parë të projektit, ku janë ndërtuar 2 kilometra kanale, ndërsa në fazën e tretë pritet të realizohet lidhja përfundimtare e gjithë rrjetit kullues.
