Shtime, 21 gusht 2025- Është përuruar Unaza e qytetit në rrugën “12 Qershori”, një projekt me vlerë rreth gjysmë milioni euro, që tashmë konsiderohet ndër rrugët më moderne të komunës së Shtimes.
Në këtë ngjarje mori pjesë edhe Kryeministri i Republikës së Kosovës, Albin Kurti, i cili tregoi për rëndësinë e investimeve të përbashkëta mes Qeverisë dhe Komunës së Shtimes:
“Shpesh vijmë e kthehemi në Shtime për shkak të investimeve të vlefshme që po realizohen. Kjo rrugë e re lehtëson qarkullimin e banorëve dhe përmirëson dukshëm kushtet e jetesës, ndërsa kostoja e gjithmbarshme ka qenë afro gjysmë milioni euro”, tha kryeministri Kurti.
Nga ana tjetër, Kryetari i Komunës së Shtimes, Dr. Qemajl Aliu, e cilësoi këtë rrugë si një nga projektet më moderne të realizuara në qytet:
“Unaza e qytetit është pjesë e segmentit që e quajmë unaza e qytetit, në krahun e djathtë në drejtim të Ferizajt. Kjo është një vepër cilësore dhe e bukur, që i shërben drejtpërdrejt qytetarëve dhe zhvillimit të komunës sonë”, tha kryetari Aliu.
Në fund, Kryetari Aliu paralajmëroi se gjatë 30 ditëve të ardhshme do të përurohen edhe tetë projekte të tjera infrastrukturore në Komunën e Shtimes, të cilat tashmë janë në përfundim e sipër.
Projekti përfshin 375 metra rrugë, që lidh rrugën“William Walker” dhe “12 Qershori”, të pajisura me trotuarë modernë dhe ndriçim publik.
