Shtime, 15 shtator 2025- Për dy netë me radhë, qyteti i Shtimes jehoi nga tingujt dhe vallet e edicionit të dytë të Festivalit FOLKFEST, i cili mblodhi ansamble nga shumë treva shqiptare dhe solli një atmosferë festive, energji dhe emocione të jashtëzakonshme.
Kryetari i Komunës së Shtimes, Dr.Qemajl Aliu, i cili për dy net me radhë përcolli nga afër festivalin, tha se ishte knaqësi që së bashku me qytetarë të shijojnë mbrëmje të mbushura me kulturë, energji dhe emocione të jashtëzakonshme
“Ansamble nga të gjitha trojet shqiptare sollën këngë e valle që na bënë të ndihemi krenarë me trashëgiminë tonë kulturore dhe e gjallëruan qytetin tonë si kurrë më parë. Pas plot performancave të mrekullueshme, çmimin e parë e fitoi Ansambli i Këngëve dhe Valleve nga Deçani, që me artin dhe shpirtin e tyre arritën të rrëmbejnë zemrat e publikut dhe jurisë profesionale. Me këtë rast, falënderoj thellësisht të rinjtë e Ansamblit ‘Ilirida’ që po e kthejnë në traditë të bukur këtë festival, që e pasuron jetën kulturore të Shtimes dhe e bën qytetin tonë qendër të trashëgimisë sonë artistike”, tha kryetari Aliu.
Në këtë festival, juria profesionale e përbërë nga prof. Dilaver Kryeziu, Sami Piraj dhe Besarta Reqica, shpërbleu më të dalluarit: valltarja më e mirë Lorik Sylejmani, valltari më i mirë Ram Isufi, valltarët më të mirë Q.K. “Kaçaniku”, dyshja më e mirë Miqo Duka dhe Zenel Beçiri, koreografia më e mirë SHKA “Zëri i Kosovës”, etnoansambli më i mirë SHKA “Dresanë” nga Dragashi, kostumet më të mira SHKA “Malësori” nga Gjonaj, këngëtarja më e mirë Fatjeta Tahiraj, këngëtari më i mirë Mustaf Ramaj, instrumentisti më i mirë Jakup Demolli, paraqitja më e mirë artistike Q.K. “Kaçaniku” dhe orkestra më e mirë SHKA “Hajvalia” nga Prishtina.
Ndërsa çmimet kryesore të festivalit i fituan: çmimi i parë AKV “Deçani”, çmimi i dytë SHKA “Malësori” nga Gjonaj dhe çmimi i tretë AKV “Zëri i Kamenicës”.
Ky festival u organizua në kuadër të aktiviteteve të 17 Shtatorit-Ditëve të Rinisë në Shtime nga Komuna e Shtimes në bashkëpunim me Ansamblin “Ilirida” dhe me përkrahjen e Ministrisë së Kulturës, Rinisë dhe Sportit.
