Shtime, 1 tetor 2025- Edhe në Shtime sot u shënua fillimi i muajit të ndërgjegjësimit kundër kancerit të gjirit, përmes një ecjeje simbolike që filloi nga oborri i QKMF-së “Dr. Vezir Bajrami” dhe përfundoi në sheshin “Ahmet Shtimja”.
Në këtë aktivitet mori pjesë kryetari i Komunës së Shtimes, Dr.Qemajl Aliu, i shoqëruar nga bashkëpunëtorë, stafi i QKMF-së, si dhe nxënësit e drejtimit të Shëndetësisë të profilit bashkëpunëtor profesional i infermierisë nga IAAP.
“Sot, në nisje të muajit të ndërgjegjësimit për kancerin, përçojmë mesazhin e fuqishëm se kujdesi për shëndetin është kujdesi për vetë jetën. Jam krenar që vitin e kaluar, për herë të parë, QKMF ‘Dr. Vezir Bajrami’ u pajis me mamograf, duke e bërë të mundur që gratë e Shtimes të kenë një mundësi konkrete për kontroll e parandalim. Jemi të përkushtuar që qytetarët tanë të ndërgjegjësohen ndaj kësaj sëmundjeje dhe të dinë se parandalimi është çelësi i fitores ndaj kancerit”, tha kryetari Aliu.
Gjatë ecjes u shpërndanë broshura me informacione të rëndësishme mbi kujdesin shëndetësor, me qëllim ngritjen e vetëdijes te qytetarët.
