Shtime, 20 dhjetor 2025- Në Shtëpinë e Kulturës në Shtime u zhvillua dje, për herë të parë, Festivali i Këngës për Fëmijë “Zërat Gazmorë”, një ngjarje që solli gëzim, emocione dhe një atmosferë të veçantë festive në këtë fundvit.
Me plot ngjyra artistike, ëmbëlsi dhe energji pozitive, festivali shënoi një moment të rëndësishëm për jetën kulturore të komunës sonë.
Hapjen e festivalit e bëri drejtori dhe drejtuesi artistik, prof. Besnik Brahimi, njëherësh ideator i kësaj ngjarjeje, i cili bëri të mundur realizimin e këtij festivali të parë për fëmijë në Shtime.
Në këtë mbrëmje festive ishte i pranishëm edhe kryetari i Komunës së Shtimes, Dr. Qemajl Aliu, i cili falënderoi organizatorët dhe theksoi rëndësinë e vazhdimësisë së këtij festivali, duke u shprehur se “Zërat Gazmorë” duhet të shndërrohet tashmë në një traditë të komunës sonë.
“Faleminderit Korit të Qytetit, nën udhëheqjen e Besnik Brahimit, dhe ekipit të përkushtuar Diellzës dhe Erblinës, Altinit për organizimin e këtij festivali kaq të bukur, ku u kënaqëm me zërat e ëmbël të fëmijëve, me energjinë e tyre pozitive dhe me pasionin që e sollën në skenë.
Shtimja ka talent, kreativitet dhe fëmijë që meritojnë përkrahje të vazhdueshme, dhe kjo mbështetje nuk do të mungojë”, tha kryetari Aliu.
Një nga pikat kulmore të festivalit ishte performanca e Korit të Fëmijëve, të cilët me zërat e tyre të pastër dhe interpretimet e shkëlqyera e shndërruan këtë ditë në një përjetim të paharrueshëm.
Fëmijët konkurrentë garuan për çmimet e festivalit, ndërsa juria profesionale, e përbërë nga prof. Mustafë Lamallari, prof. Ylberina Isufi dhe prof. Lulzim Shehu, bëri vlerësimin me përkushtim dhe profesionalizëm.
Çmimet e ndara në festival ishin si vijon:
Vendi i parë (kategoria e të vegjëlve), Dea Ilazi,
Vendi i parë (kategoria e të rriturve), Alina Hyseni,
Vendi i dytë- Armend Kadrija,
Vendi i tretë- Eliza Sopaj,
Çmimi i Jurisë- Mal Imeri,
Çmimi “Zëri më i mirë”- Vesa Hasani,
Çmimi i Mediave- Luna Beha,
Çmimi “Paraqitja më e mirë artistike”- Jerina Maksutaj,
Çmimi “Teksti më i mirë”- Anela dhe Alea Smajli,
Çmimi i Publikut- Erinda Hasani.
Festivali “Zërat Gazmorë” u mbështet nga Ministria e Kulturës, Rinisë dhe Sportit si dhe Komuna e Shtimes.
