Shtime, 14 janar 2026- Kryetari i Komunës së Shtimes, dr. Qemajl Aliu, priti sot në një takim të veçantë tri figura të shquara të botës akademike shqiptare: Ksenofon Krisafin, Pëllumb Xhufin dhe Paskal Milon. Vizita e tyre në Shtime u zhvillua në kuadër të pjesëmarrjes në tryezën shkencore të organizuar nga Forumi i Intelektualëve të Shtimes, me temën “Mohimet serbe të krimeve dhe gjenocidit-destabilizim për Ballkanin”.
Gjatë takimit, kryetari Aliu tha se bashkëbisedimi me këto personalitete përbënte një moment të çmuar reflektimi dhe përkushtimi ndaj së vërtetës historike, kujtesës kombëtare dhe përgjegjësisë intelektuale. Ai vlerësoi lart kontributin e tyre akademik dhe angazhimin e vazhdueshëm në trajtimin e çështjeve që lidhen me krimet e kryera nga Serbia, veçanërisht Masakrën e Reçakut.
“Shtimja ka dhënë një kontribut të rëndësishëm në historinë e re të Kosovës. Sot, përmes dijes, kujtesës dhe fjalës së përgjegjshme akademike, dëshmohet edhe një herë roli ynë në mbrojtje të dinjitetit kombëtar dhe në kërkimin e pandalur të drejtësisë. Prania e këtyre mendjeve të ndritura në komunën tonë është nder i veçantë dhe respekt i madh për Shtimen”, tha kryetari kryetari Aliu, duke shprehur mirënjohje të thellë për kontributin e tyre ndaj Reçakut, Kosovës dhe mbarë kombit shqiptar.
Nga ana e tyre, mysafirët falënderuan kryetarin Aliu për pritjen dhe ftesën, duke vlerësuar rëndësinë e organizimit të një ngjarjeje të tillë shkencore dhe përkujtimore në Shtime. Ata theksuan se Masakra e Reçakut mbetet një nga ngjarjet më të rëndësishme dhe më domethënëse në historinë e Kosovës, e cila kërkon trajtim të vazhdueshëm serioz dhe të bazuar në fakte shkencore.
Në shenjë mirënjohjeje për kontributin dhe pjesëmarrjen e tyre, kryetari i Komunës së Shtimes, dr. Qemajl Aliu, ua dhuroi të pranishmëve poemën simfonike “MIZER-REÇAK”, vepër e kompozitorit Liburn Jupolli, një dedikim artistik për viktimat e Masakrës së Reçakut dhe një kujtesë e përhershme e dhimbjes dhe sakrificës së tyre.
Ndërsa mysafirët, në shenjë falënderimi dhe respekti të ndërsjellë, i dhuruan kryetarit Aliu, librin “Lufta e Kosovës në labirintet diplomatike”, vepër e autorit dhe studiuesit të njohur Ksenofon Krisafi, i cili ishte njëherësh edhe i pranishëm në këtë ngjarje.
