Shtime, 15 janar 2026- Në përvjetorin e 27-të, të Masakrës së Reçakut, në Shtëpinë e Kulturës në Shtime u mbajt akademia përkujtimore, ku u nderua kujtimi i 45 civilëve të pafajshëm, të masakruar nga forcat serbe.
Në këtë akademi përkujtimore ishin të pranishëm Presidentja e Republikës së Kosovës, Vjosa Osmani, Kryeministri i Republikës së Kosovës, Albin Kurti, Kryetari i Kuvendit të Kosovës, Dimal Basha, Kryetari i Komunës së Shtimes, dr. Qemajl Aliu, ish-shefi i Misionit të OSBE-së në Kosovë, ambasadori William Walker, si dhe përfaqësues të institucioneve vendore, personalitete ndërkombëtare dhe qytetarë të shumtë. Të gjithë u mblodhën për të rikujtuar këtë akt mizor dhe për të kërkuar drejtësi për viktimat.
Presidentja e Republikës së Kosovës, Vjosa Osmani, tha se dhimbja e Reçakut nuk vjen vetëm nga ajo që ndodhi 27 vjet më parë, por edhe nga mungesa e drejtësisë dhe përpjekjet e vazhdueshme për relativizim, mohim apo deformim të së vërtetës nga Serbia.
“Reçaku nuk është vetëm një emër në historinë e Republikës sonë, por u bë pikë kthese. Kthesë që e qartësoi para botës realitetin e hidhur të regjimit gjenocidal serb ndaj civilëve të pafajshëm në Kosovë. Më 15 janar 1999, Reçaku u bë simbol i vuajtjes së një populli që kërkonte liri, por edhe simbol i guximit. Guximit për ta quajtur krimin me emrin e vërtetë. Këtë guxim e dëshmoi ai që edhe sot mbetet simbol i së vërtetës, ambasadori William Walker. Nga ajo që pa personalisht, nuk hezitoi ta përshkruajë ngjarjen si masakër që dukej qartë, padyshim, si krim kundër njerëzimit”, tha presidentja Osmani.
Kryetari i Kuvendit të Kosovës, Dimal Basha, theksoi se Masakra e Reçakut e nxori në pah fytyrën e vërtetë të ideologjisë fashiste të Serbisë.
“Reçaku ishte pika e kthesës dhe fillimi i fundit të atij shovinizmi të egër. Kjo tragjedi e tmerrshme bëri që bota të zgjohej nga heshtja e gjatë”, tha Basha.
Ndërkaq, Kryeministri i Republikës së Kosovës, Albin Kurti, në fjalimin e tij theksoi se krimet e kryera në Reçak nuk mund të fshihen nga historia e shtetit gjenocidal të Serbisë. Ai përmendi edhe ngritjen e aktakuzës nga Prokuroria Speciale ndaj 22 personave, si dëshmi se drejtësia nuk do të ndalet derisa përgjegjësit për këtë masakër të arrestohen dhe të gjykohen, edhe në mungesë.
“Krimet e kryera në Reçak nuk mund të fshihen nga historia e shtetit gjenocidal të Serbisë që i kreu, e as nga historia e popullit tonë që i përjetoi me aq shumë dhembje dhe i trashëgoi me kaq shumë vuajtje. Reçaku ishte dhe mbetet pjesë e pandashme e betejës për të vërtetën dhe drejtësinë. Ishte në qendër të procesit gjyqësor kundër Sllobodan Millosheviqit, duke dëshmuar se krimet në Kosovë ishin pjesë e politikës shtetërore të Serbisë ndaj popullsisë civile shqiptare. Edhe pse ky proces nuk u përmbyll me aktgjykim për shkak të vdekjes së Millosheviqit, faktet dhe dëshmitë për Reçakun mbetën të regjistruara në drejtësinë ndërkombëtare si konfirmim se e vërteta për këto krime nuk mund të mohohet”, tha kryeministri Kurti.
Kryetari i Komunës së Shtimes, dr. Qemajl Aliu, tha se Masakra e Reçakut është një tragjedi e shkaktuar me vetëdije dhe paramendim nga shteti gjenocidal serb.
“Reçaku është tragjedi e shkaktuar me vetëdije dhe paramendim. Reçaku është dëshmi dhe mbetet plagë që nuk shërohet dhe krenari që nuk shuhet. Reçaku është kujtesë e përhershme se liria jonë ka qenë dhe është paguar me jetën e njerëzve të pafajshëm. Drejtësia për viktimat e Reçakut ende mungon, megjithëse më 30 dhjetor Prokuroria Speciale e Kosovës ka ngritur aktakuzë ndaj 21 personave. Ne nuk do të ndalemi derisa edhe shumë të tjerë, përfshirë krerët e shtetit serb, të vihen para drejtësisë”, tha kryetari Aliu.
Ish-shefi i Misionit Verifikues të OSBE-së në Kosovë, ambasadori William Walker, tha se Kosova sot është ndër vendet më demokratike në botë.
“Kam dëgjuar fjalë lavdërimi, me të drejtë, për UÇK-në, për ata që hodhën bombat nga NATO dhe që sollën atë që shohim sot. Dhe, natyrisht, nëse dikush do të më kishte thënë 27 vjet më parë se sot do të qëndroja përballë një kryeministri dhe një presidenteje të Republikës së pavarur dhe demokratikisht të zgjedhur të Kosovës, do t’i kisha thënë se ishte i çmendur. Gjithçka që ju përfaqësoni për mua është fakti se sa shumë ndryshime ka pasur brenda vetëm 27 viteve”, tha Walker.
Në emër të banorëve të fshatit Reçak, Adem Ramadani theksoi nevojën e domosdoshme për drejtësi për viktimat e masakrës dhe për mbështetje të vazhdueshme për familjet e tyre.
Akademia përkujtimore përfundoi me një thirrje të fuqishme për drejtësi dhe me zotimin se viktimat e Reçakut dhe sakrifica e tyre nuk do të harrohen kurrë.
Mëngjesin e hershëm të 15 janarit 1999, fshati Reçak u zgjua i rrethuar nga forcat kriminale serbe. Aty u vranë mizorisht 45 fëmijë, të rritur e pleq, ndërsa për t’i mbrojtur civilët dhe më pas kufomat e të masakruarve në fshatin Reçak, ranë 9 dëshmorë të Ushtrisë Çlirimtare të Kosovës, me në krye komandantin e tyre, Ahmet Kaçiku.
