Shtime 15 janar 2026- Me rastin e shënimit të 27-vjetorit të Masakrës së Reçakut, Kryetari i Komunës së Shtimes, dr. Qemajl Aliu, së bashku me Presidenten e Republikës së Kosovës, Vjosa Osmani, Kryeministrin Albin Kurti, Kryetarin e Kuvendit dhe ambasadorin William Walker, vizituan familjen Kameri në fshatin Reçak, ku takuan Hazbi dhe Agim Kamerin, dëshmitarë të gjallë të krimeve të 15 janarit 1999.
Hazbi Kameri ishte vetëm 15 vjeç kur u plagos gjatë Masakrës së Reçakut, ndërsa babai i tij, Banush Kameri, u vra në mënyrë çnjerëzore nga forcat gjenocidale serbe.
Banushi nuk e kishte braktisur shtëpinë e tij deri në çastin e vrasjes, duke u bërë simbol i qëndresës dhe sakrificës së banorëve të Reçakut.
Ndërsa Agim Kameri, ish-kryetar i fshatit Reçak gjatë luftës, kishte rol kyç në organizimin e bartjes së trupave të të masakruarve nga Kodra e Bebushit drejt Xhamisë së fshatit.
Në ato ditë vendimtare, Agimi ishte edhe udhërrëfyes i ambasadorit William Walker, duke kontribuar në zbardhjen e së vërtetës së Masakrës së Reçakut para opinionit ndërkombëtar.
Hazbi Kameri, sot baba i tre fëmijëve, mbetet dëshmi e gjallë e mizorisë së 15 janarit 1999, ndërsa brezat pasues janë garancia se krimet e kryera në Reçak nuk do të harrohen dhe as nuk do të mohohen.
