Shtime, 14 mars 2026- Kryetari i Komunës së Shtimes, dr. Qemajl Aliu, ka pritur në një takim aktivisten e njohur shqiptare nga Sanxhaku, Amina Nuraj, e cila njihet për angazhimin e saj në ruajtjen dhe promovimin e gjuhës, kulturës dhe historisë shqiptare.
Gjatë takimit, kryetari Aliu vlerësoi lart veprimtarinë e saj dhe përkushtimin në mbrojtjen e të drejtave të shqiptarëve që jetojnë atje.
“Pata kënaqësinë ta mirëpres në takim znj. Amina Nuraj, veprimtare e çështjes kombëtare dhe një vajzë e shkëlqyer nga Sanxhaku, e cila po punon me përkushtim për ta ngritur zërin e shqiptarëve që jetojnë në Serbi dhe që shpesh përballen me shtypje dhe persekutim administrativ. Amina është e angazhuar në denoncimin e mohimit të të drejtave kombëtare dhe gjuhësore ndaj shqiptarëve, si dhe në përpjekjet për rikthimin dhe garantimin e të drejtave të tyre elementare në trojet e tyre etnike shekullore”, tha kryetari Aliu.
Ai theksoi se gjatë bisedës u diskutua për gjendjen e shqiptarëve në Sanxhak, për sfidat me të cilat përballen, si dhe për nevojën që opinioni publik, veçanërisht ai ndërkombëtar, të informohet për shkeljet e të drejtave të tyre nga shteti serb.
Kryetari Aliu gjithashtu e falënderoi Nurajn për përkushtimin dhe për takimin e vlefshëm e frymëzues.
Amina Nuraj njihet për punën dhe angazhimin e saj në fuqizimin e ndërgjegjësimit mbi historinë dhe realitetin e shqiptarëve në Sanxhak. Me këtë rast, ajo i dhuroi kryetarit Aliu librin e saj me titull “Unë, Bija e Atdheut”, i cili synon të dokumentojë realitetin historik dhe kulturor të shqiptarëve në këtë rajon.
