Shtime, 5 maj w026- Me rastin e 5 Majit-Ditës së Dëshmorëve të Kombit, në Shtime u mbajt akademi përkujtimore e organizuar nga Kryetari i Komunës, dr. Qemajl Aliu, në bashkëpunim me Shoqatën e Familjeve të Dëshmorëve-Dega në Shtime.
Kjo akademi iu kushtua heroinave të Kosovës dhe bashkëshortëve të tyre, të cilët ranë heroikisht në altarin e lirisë.
Në këtë akademi morën pjesë, përveç kryetarit Aliu, edhe ministri Andin Hoti, familjarë të dëshmorëve, përfaqësues të shoqatave të dala nga lufta e UÇK-së, përfaqësues institucionesh, bashkëpunëtorë dhe qytetarë të shumtë. Në mesin e të pranishmëve ishte edhe Selvete Krasniqi-Hajrullahu, e cila përfaqësonte kujtesën dhe dinjitetin e familjeve të dëshmorëve.
Në fjalën e tij, kryetari dr. Qemajl Aliu theksoi rëndësinë e kujtesës historike dhe krenarisë kombëtare.
“Nuk ka krenari më të madhe se të jesh shqiptar e të jemi pjesëtarë të një kombi me histori kaq të lavdishme.
E kaluara jonë është unike në mbarë botën, sepse atë e kanë ndërtuar gratë e burrat më të denjë të kësaj toke të ujitur me gjakun e dëshmorëve, ditën e të cilëve e shënuam sot, Ditën e Dëshmorëve të Kombit.
Bashkë me Shoqatën e Familjeve të Dëshmorëve-Dega në Shtime, vlerësuam e nderuam ato më të guximshmet, heroinat e Kosovës, gratë e vajzat e sypatrembur, siç është dëshmorja e Shtimes, Hanumshahe Mujota, me shumë shoqe të saj që me dinjitet u bënë pjesë e historisë sonë më të ndritur.
Historia jonë, nga kullat e Jasharëve e deri te sakrifica e Reçakut, është dëshmi e qëndresës së hekurt.
Lavdi e përjetshme dëshmorëve të Kombit”, tha kryetari Aliu.
Ndërkaq, ministri Andin Hoti u ndal te pesha e kujtesës dhe numri i madh i emrave që kanë shënuar historinë e luftës për liri.
“Kur e lexova këtë fjali, nisa të mendoj se cilët emra të luftës së fundit dhe përgjatë historisë do t’i përmend si burra e gra që luftuan e u flijuan për më të shtrenjtën liri. Nisa të udhëtoj në histori e të vij drejt luftës së lavdishme të Ushtrisë Çlirimtare të Kosovës. Aq shumë emra e shembuj më ranë ndër mend, saqë mendova se si është e mundur që një popull kaq i vogël e gjen veten në secilën vlerë. Tek një popull kaq i vogël gjen emra e vepra që vështirë i gjen edhe tek popujt më të mëdhenj përgjatë gjithë botës”, tha ministri Hoti, duke rikujtuar në mënyrë kronologjike sakrificat e shumta për lirinë e vendit.
Në këtë akademi, me fjalë rasti u drejtua edhe Selvete Krasniqi-Hajrullahu, motra e heroines Xhevë Lladrovci, e cila me krenari rikujtoi luftën e lavdishme të UÇK-së dhe sakrificën sublime të dëshmorëve. Ajo theksoi se historia e kësaj lufte është një amanet i shenjtë për brezat e rinj dhe duhet të ruhet e të përcillet brez pas brezi, në mënyrë që heroizmi dhe flijimi për liri të mos harrohen kurrë, por të mbeten udhërrëfyes për të ardhmen.
Në emër të shoqatave të dala nga lufta e UÇK-së, Dega në Shtime, foli edhe Muhamet Bilalli, i cili vlerësoi rëndësinë e organizimit të kësaj akademie.
“Sot, në këtë akademi përkujtimore, përkujtojmë heroinat dhe heronjtë e kombit që kanë rënë për të mos vdekur kurrë, sepse liria e kombeve është e pavdekshme. Heroinat e kombit janë bërë pjesë e historisë sonë kombëtare, janë bërë pjesë e ndërgjegjes sonë historike, sepse lufta dhe rënia e tyre ishte pjesë e organizimit të Ushtrisë Çlirimtare të Kosovës, në krye me komandantin legjendar Adem Jashari”, tha Bilalli.
Në përmbyllje të akademisë, kryetari Qemajl Aliu, ministri Andin Hoti dhe përfaqësuesit e shoqatave të dala nga lufta e UÇK-së në Shtime ndanë mirënjohje për heroinat e Kosovës, në shenjë nderimi dhe respekti për sakrificën e tyre të lartë.
