Shtime, 7 maj 2026- Kryetari i Komunës së Shtimes, dr. Qemajl Aliu, sot ka pritur në takim pjesëtarë të Njësisë Profesionale për Zjarrfikje dhe Shpëtim në Shtime, ku në shenjë vlerësimi dhe mirënjohjeje për punën e tyre të palodhshme, ndau mirënjohje për komandantin Bajram Gashi dhe ekipin e tij.
Me këtë rast, kryetari Aliu vlerësoi lart kontributin e çmuar, përkushtimin e vazhdueshëm dhe guximin e treguar nga zjarrfikësit në shërbim të qytetarëve, në mbrojtje të jetës, pronës dhe mjedisit, duke theksuar se puna e tyre është një ndër shtyllat më të rëndësishme të sigurisë dhe mbrojtjes civile në komunë.
“Kjo mirënjohje është një shprehje e respektit dhe falënderimit institucional për secilin prej jush, të cilët çdo ditë jeni në gatishmëri për t’u përballur me sfida dhe rreziqe në mbrojtje të qytetarëve tanë.
Profesionalizmi, përkushtimi dhe humanizmi që tregoni në çdo intervenim janë shembull i shërbimit ndaj qytetarëve dhe meritoni vlerësimin më të lartë,” tha kryetari Aliu, duke shtuar se Komuna e Shtimes do të vazhdojë të mbështesë Njësinë Profesionale për Zjarrfikje dhe Shpëtim, me qëllim të krijimit të kushteve sa më të mira për punën dhe angazhimin e tyre në shërbim të qytetarëve.
Nga ana e tyre, komandanti Bajram Gashi dhe pjesëtarët e njësisë falënderuan kryetarin Aliu për vlerësimin dhe mbështetjen, duke ritheksuar përkushtimin e tyre për të qenë gjithmonë në shërbim të qytetarëve dhe sigurisë publike.
