Shtime, 27 qershor 2026- Rrjeti i marketeve Interex ka zgjeruar veprimtarinë e tij me hapjen e një pike të re në Komunën e Shtimes, e cila u inaugurua dje, duke ofruar mundësi më të mëdha për furnizim, si dhe duke krijuar vende të reja pune për qytetarët.
Me ftesë të pronarit të rrjetit të marketeve Interex, Shaip Mikullofci, në ceremoninë e inaugurimit morën pjesë nënkryetari i Komunës së Shtimes, Adnan Ademi, si dhe humanisti Halil Kastrati.
Me këtë rast, nënkryetari Ademi përgëzoi pronarin dhe stafin e Interex-it për këtë investim, duke theksuar se Shtimja po shndërrohet çdo ditë e më shumë në një komunë tërheqëse për investime dhe zhvillim ekonomik.
“Nga dita në ditë, Shtimja po dëshmon se është një vend i përshtatshëm për investitorët. Hapja e bizneseve të reja jo vetëm që rrit konkurrencën dhe cilësinë e shërbimeve, por krijon edhe vende të reja pune dhe kontribuon në zhvillimin ekonomik të komunës sonë. Uroj që Interex të ketë sukses dhe kjo pikë të jetë në shërbim të qytetarëve për shumë vite”, tha nënkryetari Ademi.
