Shtime, 29 gusht 2026- Kryetari i Komunës së Shtimes, dr. Qemajl Aliu, zhvilloi dje një vizitë zyrtare në Komunën e Preshevës, ku u prit nga Kryetarja e kësaj komune, Ardita Sinani. Në këtë vizitë, Kryetari Aliu u shoqërua nga Nënkryetari i Komunës, Adnan Ademi, Drejtoresha e Kulturës, Rinisë dhe Sportit, Sanie Sadiku, si dhe Shefja e Kabinetit, Anita Kurti.
Gjatë takimit, në një atmosferë të ngrohtë dhe vëllazërore, u diskutua për mundësitë e bashkëpunimit ndërmjet dy komunave, me fokus në kulturë, sport, rini dhe zhvillimin e hapësirave të gjelbra. Të dyja palët u dakorduan për ndërtimin e partneriteteve konkrete, me synim krijimin e mundësive të reja dhe përfitimeve të ndërsjella për qytetarët e Shtimes dhe Preshevës.
“Dy qytete shqiptare, të bashkuara në vullnet e vizion, që punojnë krah për krah për mirëqenien sociale dhe prosperitetin e përbashkët të qytetarëve tanë”, tha kryetari Aliu.
Në kuadër të vizitës, Kryetari Aliu dhe Kryetarja Sinani morën pjesë edhe në ndeshjen miqësore ndërmjet FC Lindorët dhe FC Shtimja, të zhvilluar në Stadiumin e Vogël të Qytetit në Preshevë. Të dyja skuadrat u përgëzuan për sportivitetin dhe atmosferën e mirë të krijuar gjatë ndeshjes.
Kryetari Aliu falënderoi Kryetaren Ardita Sinani dhe stafin e Komunës së Preshevës për mikpritjen dhe gatishmërinë për bashkëpunim, duke shprehur bindjen se kjo vizitë do të jetë një hap i rëndësishëm drejt realizimit të projekteve të përbashkëta në të mirë të qytetarëve të të dyja komunave.
