Shtime, 11 prill 2025- Në përvjetorin e 26-të të rënies heroike, përulemi me respekt dhe krenari para jetës dhe veprës së dëshmorit të Komunës së Shtimes, Rrahman Tafa, i cili ra më 11 prill 1999 në betejën legjendare të Koshares. Në atë betejë madhore të Ushtrisë Çlirimtare të Kosovës, ku u thye për herë të parë kufiri shqiptaro-shqiptar, Rrahmani dha jetën e tij për lirinë e atdheut. Ata u bënë simbol i guximit dhe vendosmërisë, duke hyrë në historinë e lavdishme të luftës për çlirim kombëtar. Ai ra për të mos u harruar kurrë, duke lënë pas një amanet të shenjtë, që Kosova të jetojë e lirë.
Veprat dhe heroizmi i tij janë frymëzim i përhershëm për brezat që rriten në lirinë e fituar me gjakun e tyre. Sot, kur kujtojmë Rrahmanin, kujtojmë të gjithë dëshmorët e Koshares dhe mbarë Kosovës. Kujtojmë se liria nuk erdhi vetë, por u fitua me sakrificën më sublime.
Lavdi përjetë dëshmorit Rrahman Tafa! Nderim të gjithë atyre që dhanë gjithçka për lirinë tonë!
