Shtime, 15 korrik 2025- Në kuadër të pjesëmarrjes së delegacionit të Komunës së Shtimes në Festivalin Ndërkombëtar të Vallëzimit Popullor në qytetin Denizli të Turqisë, Kryetari i Komunës, Dr.Qemajl Aliu, së bashku me Nënkryetarin Faruk Beqa, Drejtoreshën për Kulturë, Rini dhe Sport, Albana Fazliu dhe shefen e kabinetit Anita Kurtin, u pritën në një takim zyrtar nga Kryetari i qytetit të Denizlit, Bülent Nuri Çavuşoğlu.
Kryetari Aliu, vlerësoi rëndësinë e këtij takimi duke thënë se ishte kënaqësi e veçantë të mirëpriteshim ngrohtësisht në këtë vizitë zyrtare nga Kryetari i qytetit të Denizlit
“Në takimin me kryetarin, Bülent Nuri Çavuşoğlu, diskutuam për mundësitë e bashkëpunimit në fushën e kulturës dhe nxitjen e shkëmbimeve artistike mes dy qyteteve tona”, tha kryetari Aliu, i cili në shenjë mirënjohjeje për mikpritjen dhe mundësinë e krijuar, i dhuroi Çavuşoğlu një hartë të Kosovës, si simbol i respektit dhe vlerësimit.
Kjo vizitë ndodhi në kuadër të mbështetjes së drejtpërdrejtë të Ansamblit të Këngëve dhe Valleve “Ilirida” nga Shtimja, i cili po përfaqëson me dinjitet jo vetëm komunën, por edhe mbarë Kosovën në këtë festival ndërkombëtar.
Me këtë rast, kryetari Aliu shprehu mirënjohjen e tij edhe për punën e palodhshme të udhëheqësit të ansamblit.
“Faleminderit nga zemra profesor Besnikut për përkushtimin e tij të jashtëzakonshëm me të rinjtë dhe të rejat, të cilët po bartin me krenari dhe dinjitet trashëgiminë tonë kulturore brez pas brezi”, tha kryetari Aliu.
Ansambli po prezanton me krenari trashëgiminë shpirtërore shqiptare, përmes kostumeve tradicionale, valleve karakteristike dhe shpirtit të pasur të kulturës sonë popullore.
Ansambli “Ilirida” do të qëndrojë për një javë në Denizli, ku do të ketë performanca të shumta, duke afirmuar përmes artit dhe vallëzimit vlerat e pasura të folklorit shqiptar dhe duke sjellë krenari për të gjithë qytetarët e Shtimes dhe më gjerë.
