Komuna e Shtimes e konsideron të pavërtetë dhe të pabazë deklaratën e Kryetarit të PDK-së në Shtime, z. Rrahman Jakupi, i cili në një reagim të tij ka pretenduar se Kryetari i Komunës, z. Qemajl Aliu, ka bllokuar një investim gjerman në vlerë prej 300 milionë euro.
Për informimin korrekt të opinionit publik, theksojmë se është e pamundur që një investitor privat të marrë vendim për një investim të përmasave të tilla vetëm në nivel komunal, pa kaluar nëpër procedurat ligjore dhe institucionale të përcaktuara nga legjislacioni i Republikës së Kosovës. Ligji për Investimet Strategjike qartë përcakton procedurat, rolin e institucioneve qendrore dhe lokale si dhe kriteret për projektet që mund të marrin statusin e investitorit strategjik.
Në rastin konkret, ekzistojnë dy fakte kryesore që dëshmojnë qartazi të kundërtën e asaj që është pretenduar nga z. Jakupi:
Së pari, pronat për të cilat investitori ka shprehur interes janë nën administrimin e Agjencisë Kosovare të Privatizimit (AKP), ndaj Komuna e Shtimes nuk ka kompetencë në lidhje me to dhe nuk mban përgjegjësi për trajtimin e tyre.
Së dyti, vetë investitori nuk ka marrë pëlqimin nga AKP për sigurimin e dokumentacionit të nevojshëm, gjë që e pamundëson zhvillimin e mëtejmë të kërkesës.
Këto fakte tregojnë se pretendimi i bërë publikisht është i pabazuar dhe synon të krijojë konfuzion te qytetarët dhe të hedhë dyshime të paarsyeshme mbi punën e institucioneve komunale.
Për më tepër, për hir të transparencës, sqarojmë se përgjigjja e cila po tentohet të paraqitet si pengesë, është lëshuar nga një zyrtare profesionale e Urbanizmit, e cila përveç se është arkitekte, ka qenë edhe ish-drejtore e Urbanizmit në Komunën e Shtimes nga radhët e PDK-së gjatë periudhës 2017–2021.
Fokusi i vetëm i Komunës së Shtimes është realizimi i projekteve konkrete në shërbim të qytetarëve, e jo përfshirja në propagandë politike.
