Shtime, 10 Prill 2025-Familja Gashi, njëra nga familjet strehuese të Komunës së Shtimes, vizitoi sot kryetarin e komunës, Qemajl Aliu, për të shprehur mirënjohjen e tyre për mbështetjen e vazhdueshme financiare dhe kujdesin e treguar për ofrimin e shërbimeve shëndetësore ndaj fëmijëve që kanë në përkujdesje.
Kjo vizitë vjen edhe pas angazhimeve të ndërmarra nga Komuna e Shtimes, ku ditëve të fundit është nënshkruar një marrëveshje bashkëpunimi ndërmjet Spitalit të Ferizajt, Qendrës Kryesore të Mjekësisë Familjare dhe Qendrës për Punë Sociale. Marrëveshja e nënshkruar synon të ofrojë shërbime shëndetësore falas për të gjithë fëmijët që jetojnë në familjet strehuese të Komunës së Shtimes.
“Të jesh pranë familjeve strehuese nuk është vetëm obligim institucional, por mbi të gjitha, është një mision njerëzor”, tha kryetari Qemajl Aliu gjatë takimit.
Vitin e kaluar, Komuna e Shtimes kishte filluar për herë të parë të ndihmojë familjet strehuese me një shumë prej 100 euro në muaj. Këtë vit, kjo mbështetje është rritur në 150 euro për çdo familje.
Në fund të takimit, familja strehuese i dhuroi kryetarit Aliu një dhuratë simbolike, në shenjë falënderimi dhe respekti për përkushtimin që ai dhe institucionet e komunës kanë treguar ndaj tyre.
