Shtime, 30 janar 2025– Një projekt i rëndësishëm infrastrukturor ka nisur sot në Komunën e Shtimes, ku është bërë hapja zyrtare e punimeve për ndërtimin e Unazës së Madhe, një rrugë e re që do të shtrihet nga rrethrrotullimi i pishave në drejtim të Belincit, Reçakut dhe Petrovës. Ky projekt, me një gjatësi prej 3.4 kilometrash dhe gjerësi 7 metra, ka një investim prej 1.5 milionë eurosh dhe synon të përmirësojë qarkullimin dhe sigurinë e qytetarëve të Komunës së Shtimes.
Ministri i Infrastrukturës, Liburn Aliu, i pranishëm në fillimin e punimeve, tha se ky projekt nuk është vetëm një investim në infrastrukturë, por një investim në sigurinë dhe mirëqenien e qytetarëve.
“Me ndërtimin e Unazës së Madhe, trafiku i automjeteve të tonazhit të rëndë do të devijohet jashtë qendrave të banuara, duke lehtësuar lëvizjen dhe duke përmirësuar cilësinë e jetës në Shtime”, tha ministri Aliu.
Ndërsa, Kryetari i Komunës së Shtimes, Qemajl Aliu, e cilësoi këtë ditë si një moment historik për qytatarët e komunës tonë.
“Fillimi i sotëm i punimeve për Unazën e Madhe që e bëmë në prani të Ministrit Liburn Aliu e qytetarëve tanë të dashur, është ditë feste për të gjithë Komunën tonë. Kjo rrugë do ta lehtësojë trafikun në fshatrat Belinc, Petrovë dhe Reçak, duke sjellë ndryshim të prekshëm në jetën e banorëve tanë. Projekti do të përfundojë brenda këtij viti dhe është një tjetër premtim madhor të cilin po e realizojmë”, tha kryetari Aliu.
Pritet që rruga e re të ndikojë pozitivisht në qarkullimin, duke eliminuar kalimin e mjeteve të tonazhit të rëndë në rrugët e ngushta të Petrovës dhe Reçakut dhe duke rritur sigurinë për këmbësorët dhe drejtuesit e automjeteve.
Puna për ndërtimin e Unazës së Madhe pritet të përfundojë brenda këtij viti, duke sjellë një transformim të rëndësishëm për infrastrukturën rrugore të Komunës së Shtimes.
