Shtime, 8 shtator 2025- Komuna e Shtimes ka filluar sot procesin e dëgjimeve buxhetore për hartimin e buxhetit për vitin 2026.
Dëgjimi i parë publik u mbajt me grupet e nën-përfaqësuara: gra, të rinj, pensionistë, persona me aftësi të kufizuara etj.
Të pranishëm në këtë takim ishin: Kryetari i Komunës, Dr. Qemajl Aliu, Kryesuesi i Kuvendit, Adnan Ademi, Drejtori i Financave, Besnik Ahmeti, Drejtori i Shërbimeve Publike, Bardhyl Rushiti, si dhe qytetarë nga komuna jonë.
Në hapje të takimit, kryetari Aliu tha se dëgjimet buxhetore janë një mundësi e mirë për të kuptuar sa më saktë kërkesat e grupeve të interesit, në mënyrë që ato të reflektohen në planifikimin e buxhetit për vitin 2026.
Ndërsa drejtori i Financave, Besnik Ahmeti, u shpreh se shumë nga kërkesat e qytetarëve nga dëgjimet e mëparshme tashmë janë marrë parasysh dhe janë përfshirë në buxhet. Sipas tij, ky proces do të vazhdojë për ta finalizuar dokumentin në mënyrën më të mirë të mundshme, duke përfshirë edhe propozimet e reja që do të dalin gjatë këtyre dëgjimeve.
Gjatë diskutimeve, pjesëmarrësit paraqitën kërkesa dhe propozime, ndër to u veçua çështja e mbrojtjes së ambientit, e ngritur nga qytetari Hysen Hoxha, si dhe kërkesa për subvencionime në mbështetje të personave me aftësi të kufizuara.
Dëgjimet buxhetore do të vazhdojnë edhe nesër, duke filluar nga ora 16:00 me organizatat, klubet sportive dhe bizneset, ndërsa nga ora 18:00 do të mbahet dëgjimi publik i përgjithshëm me qytetarët e Komunës së Shtimes.
