Shtime, 26 qershor 2025-Në kuadër të mbështetjes së vazhdueshme që Ministria e Shëndetësisë po i jep shëndetësisë, edhe Komuna e Shtimes është përfituese e një donacioni. Kësaj radhe, Shtimes iu dorëzua një autoambulancë moderne, shumë e nevojshme për përmirësimin e shërbimeve shëndetësore dhe për reagim të shpejtë në rastet urgjente.
Pranimin e këtij donacioni e bënë Kryetari i Komunës, Dr. Qemajl Aliu, drejtoresha e Shëndetësisë Mimoza Salihu-Qeriqi, si dhe bashkpunëtorë të tjerë shëndetësor.
“Kjo është mbështetja e tretë për komunën tonë brenda pak ditësh nga Qeveria Kurti, pas projekteve milionëshe për ndërtimin e Entit Special dhe QKMF-së së re në Shtime. E falënderoj Qeverinë e Kosovës, Ministrin e Shëndetësisë Arben Vitia dhe Zëvendësministrin Arsim Berisha për këtë ndihmë konkrete dhe mbështetjen e pakursyer ndaj komunës sonë”, tha kryetari Aliu.
Nga ana tjetër, Ministri i Shëndetësisë Arben Vitia vlerësoi bashkëpunimin me Shtimen dhe përkushtimin e kryetarit Aliu.
“Dr. Qemajl Aliu është një bashkëpunëtor i vendosur në betejën tonë të përbashkët për drejtësi sociale dhe shërbime publike me dinjitet. Në një shtet që kujdeset, nuk ka vend për neglizhencë.
Ndërtimi i Institutit Special dhe QKMF-së së re në Shtime janë më shumë se projekte infrastrukturore, janë angazhim për barazi dhe kujdes ndaj qytetarëve.
Sot, dorëzuam edhe çelësat e autoambulancës së re, e cila do të jetë në terren, në shërbim aty ku nevojat janë urgjente dhe jeta varet nga sekondat”, tha ministri Vitia, duke falënderuar kryetarin Aliu për përkushtimin dhe siguroi qytetarët e Shtimes se Ministria e Shëndetësisë do të vazhdojë të qëndrojë krah tyre me investime konkrete në shëndetësi.
