Shtime, 6 maj 2025- Kryetari i Komunës së Shtimes, Qemajl Aliu, priti sot në takim Kryeshefen Ekzekutive të Postës së Kosovës, Nora Rraci, me qëllim të thellimit të bashkëpunimit ndërinstitucional dhe ofrimit të shërbimeve më efikase për qytetarët.
Gjatë këtij takimi, kryetari Aliu ngriti çështjen e dislokimit të zyrës postare nga lokacioni aktual, një kërkesë e vazhdueshme e banorëve të zonës, me synimin për të ofruar kushte më të mira dhe më të qasshme për të gjithë qytetarët. Në bisedë, u trajtuan edhe mundësitë për bashkëpunim të ndërsjellë me theks në rritjen e efikasitetit institucional dhe kapacitetin shërbyes të Postës së Kosovës.
“Në thelb të angazhimit tonë qëndron interesi i qytetarit. Jemi të përkushtuar të bashkëpunojmë me çdo institucion që ndihmon në përmirësimin e shërbimeve publike dhe i sjell institucionet më afër njerëzve”, tha kryetari Aliu.
Në kuadër të këtij bashkëpunimi, u realizua edhe nënshkrimi i një Memorandumi Mirëkuptimi mes Komunës së Shtimes, Postës së Kosovës dhe Policisë Rajonale në Ferizaj, përfaqësuar nga drejtori Faton Pllana.
Marrëveshja parasheh që gjobat për shkeljet në komunikacion të shpërndahen përmes Postës së Kosovës direkt në adresat e qytetarëve, një veprim që pritet të lehtësojë ndjeshëm përmbushjen e obligimeve ndaj institucioneve.
