Shtime, 16 maj 2025- Pas mbajtjes së Kuvendit Zgjedhor të Forumit të Intelektualëve në Shtime, kryetari i Komunës, Qemajl Aliu, ka pritur në një takim zyrtar kryesinë e sapozgjedhur të këtij forumi.
Kryesia, e përbërë nga 11 anëtarë, ishte e prirë nga kryetari Banush Imeri, nënkryetarët Abdyl Hajredini dhe Bulëza Hysenaj, sekretari Fehmi Hysenaj, si dhe shtatë anëtarët e tjerë të zgjedhur.
Në këtë takim, kryetari Aliu shprehu mirënjohjen dhe përgëzimet për angazhimin e tyre, duke theksuar rëndësinë që ka Forumi i Intelektualëve në fuqizimin e debatit publik dhe zhvillimin qytetar.
“Forumi i Intelektualëve është një hapësirë e domosdoshme për zhvillimin e mendimit kritik dhe pjesëmarrjen aktive në jetën publike. Komuna e Shtimes do të jetë gjithmonë përkrahëse e iniciativave të tilla që sjellin vlera dhe perspektivë për qytetarët”, tha kryetari Aliu.
Kuvendi Zgjedhor i Forumit u mbajt ditë më parë, me pjesëmarrjen e 37 delegatëve dhe një numri të konsiderueshëm mysafirësh. Ngjarja u organizua në ambientet e “Mjellma Event”, të cilët ofruan sallën dhe shërbimet pa pagesë.
Fjalën tematike e mbajti profesori Banush Imeri dhe Abdyl Hajredini, por edhe kryetari Aliu përshëndeti të pranishmit, duke u zotuar për bashkëpunim dhe mbështetje institucionale për forumin në fjalë me qëllim që së bashku të kontribuojnë në ndërtimin e një jete publike më cilësore dhe gjithëpërfshirëse në komunën e Shtimes.
Pas votimit të fshehtë, kryesia e forumit u zgjodh në këtë përbërje:
Banush Imeri-Kryetar,
Abdyl Hajredini-Nënkryetar,
Bulëza Hysenaj-Nënkryetare,
Fehmi Hysenaj-Sekretar,
Hyzer Gashi, Kemajl Ademaj, Ruzhdi Jashari, Emine Jetishi, Antigona Jashari, Ali Uka dhe Shaban Halimi-Anëtarë.
