Shtime, 5 shkurt 2026- Kryetari i Komunës së Shtimes, Dr. Qemajl Aliu, priti sot në takim z. Nuno Queirós, përfaqësuesin e përhershëm të UNDP-së në Kosovë, së bashku me bashkëpunëtorët e tij. Në kuadër të kësaj vizite, ata vizituan 11 bizneset e para përfituese nga programi “In Motion”, i zbatuar përmes bashkëpunimit ndërmjet Komunës së Shtimes dhe UNDP-së.
Kryetari Aliu theksoi se programi synon fuqizimin e bizneseve të vogla dhe të mesme përmes mbështetjes konkrete dhe të drejtpërdrejtë.
“Programi In Motion ka pasur ndikim shumë pozitiv në fuqizimin ekonomik të Komunës së Shtimes. Gjatë vizitës, pamë nga afër se si mbështetja e ofruar ka ndikuar në rritjen, modernizimin dhe përmirësimin e performancës së bizneseve në treg. Falë bashkëpunimit me UNDP-në, këto biznese janë pajisur me teknologji të reja, kanë përmirësuar imazhin e tyre dhe kanë rritur kapacitetet prodhuese, duke krijuar kushte më të mira për punësim dhe zhvillim të sektorit privat. Komuna e Shtimes mbetet e përkushtuar për ta vazhduar dhe zgjeruar këtë partneritet edhe në të ardhmen”, tha kryetari Aliu.
Qëllimi i programit ka qenë ofrimi i asistencës teknike të personalizuar dhe grantet për bizneset, duke i ndihmuar ato të rrisin kapacitetet prodhuese, të përmirësojnë imazhin tregtar dhe të forcojnë integrimin në treg.
Ky projekt, përveç mbështetjes konkrete për bizneset lokale, synon gjithashtu të ndikojë drejtpërdrejt në krijimin e vendeve të reja të punës dhe në zhvillimin ekonomik të Komunës së Shtimes.
