Shtime, 7 prill 2025- Presidentja e Republikës së Kosovës, Vjosa Osmani, realizoi sot një vizitë zyrtare në Komunën e Shtimes, ku u prit ngrohtësisht nga kryetari i komunës, Qemajl Aliu, së bashku me bashkëpunëtorët e tij.
Në këtë takim u diskutua për projektet aktuale, sfidat e komunës dhe potencialin që Shtimja ofron për zhvillim të qëndrueshëm.
“Është kënaqësi që sot ta vizitoj Komunën e Shtimes, te kryetari Qemajl Aliu. Këtë vizitë e kemi planifikuar që një kohë të gjatë. Sot kishim një diskutim shumë të frytshëm, lidhur me punët që po bëhen këtu në komunën e Shtimes, në të mirë të të gjithë qytetarëve, lidhur me projektet e së ardhmes dhe lidhur me atë se si mund të ndihmojmë ne si presidencë, që të paraqesim potencialin e kësaj komune”, tha Presidentja Osmani, duke shtuar se Komuna e Shtimes ka dhënë një kontribut të jashtëzakonshëm për lirinë dhe çlirimin e Kosovës, duke përmendur edhe rëndësinë e përkujtimit të Masakrës së Reçakut më 15 janar të çdo viti, një ngjarje që shënoi kthesën e madhe për Kosovën në arenën ndërkombëtare. “Është shumë me rëndësi që Shtimen ta shohim edhe për potencialin që ajo ofron sot, sepse është një komunë përplot me të rinj e të reja, secili më i jashtëzakonshëm se tjetri, njerëz të cilët po japin kontribut si në sektorin privat, por edhe në atë publik. Prandaj qytetarët e Shtimes e meritojnë gjithë vëmendjen dhe mbështetjen tonë”, tha Presidentja Osmani.
Nga ana tjetër, kryetari i Komunës së Shtimes, Qemajl Aliu, shprehu falënderimin dhe nderimin për këtë vizitë të rëndësishme, duke theksuar se mbështetja nga niveli qendror është thelbësore për realizimin e projekteve zhvillimore në komunën e Shtimes.
“Sot kishim kënaqësinë dhe nderin e veçantë ta kishim mysafire në komunën tonë Presidenten e Republikës së Kosovës, zonjën Vjosa Osmani. E njoftova me zhvillimet në komunën tonë, me sfidat dhe projektet që kemi. Siç e dini, presidentja nuk është hera e parë që e viziton komunën tonë, ajo së bashku me kryeministrin dhe kryeparlamentarin, kanë qenë për çdo 15 janar, në shenjë nderimi për Masakrën e Reçakut, ngjarje që bëri kthesën e madhe të lirisë dhe çlirimit të vendit tonë”,tha kryetari kryetari Aliu.
Në përmbyllje të takim, kryetari Aliu i dhuroi Presidentes Osmani disa punime artizanale të realizuara nga banorët e Entit Special në Shtime, duke theksuar vlerën e përfshirjes dhe talentit të secilit individ në atë vend.
Vizita e Presidentes Osmani vjen në kuadër të takimeve me drejtuesit lokalë me qëllim thellimin e bashkëpunimit ndërinstitucional dhe adresimin e sfidave që përballen qytetarët në jetën e përditshme
