Shtime, 24 prill 2025- Kryetari i Komunës së Shtimes, Qemajl Aliu, ka vizituar sot punimet që po zhvillohen në shkollën fillore “Bajram Curri” në fshatin Petrovë, një projekt madhor që parasheh investime në vlerë afro 1.5 milion euro.
Gjatë vizitës, kryetari Aliu u shoqërua nga drejtori i shkollës, Alban Rashiti, me të cilin vëzhguan nga afër ecurinë e projektit, i cili përfshin ndërtimin e një aneksi të ri, renovimin e objektit ekzistues, rregullimin e fushës së jashtme sportive si dhe funksionalizimin e plotë të sallës së sporteve.
“Punimet po ecin me dinamikë të lartë dhe realizimi i tij do të sigurojë ambient arsimor krejtësisht të ri, modern, funksional dhe të denjë për nxënësit tanë”, tha kryetari Aliu, duke shtuar se investimi në arsim mbetet prioritet për Komunën e Shtimes dhe se përkushtimi i institucioneve lokale është i drejtuar kah krijimi i kushteve më të mira për të gjithë nxënësit, si një kontribut i drejtpërdrejtë për të ardhmen e shoqërisë.
Bëhet e ditur se projekti pritet të përfundojë brenda afatit të përcaktuar kohor dhe, sipas kryetarit, do të shërbejë si model për përmirësimin e infrastrukturës edhe në shkollat tjera të komunës.
