Shtime, 17 janar 2026- Në ambientet e Shkollës Fillore “Emin Duraku” në Shtime, sot janë mbajtur Garat Komunale të Fizikës, të organizuara nga Drejtoria Komunale e Arsimit në bashkëpunim me Shoqatën Kosovare të Fizikës.
Këto gara përbëjnë një ngjarje të rëndësishme arsimore, që synon nxitjen e interesimit për shkencat natyrore dhe identifikimin e talenteve të reja në fushën e fizikës.
Në këtë garë morën pjesë gjithsej 21 nxënës nga klasat VII, VIII, IX, X, XI dhe XII, të cilët përfaqësuan shkollat e ndryshme të komunës së Shtimes. Nxënësit patën mundësinë të demonstrojnë njohuritë dhe aftësitë e tyre në fizikë përmes detyrave të përgatitura sipas standardeve të Shoqatës Kosovare të Fizikës.
Udhëheqësi i Sektorit të Arsimit, Lulzim Sahiti, theksoi se këto gara përbëjnë një mundësi të shkëlqyer për të nxitur nxënësit e talentuar dhe për të identifikuar potencialin e tyre akademik në fizikë. Ai u shpreh se aktivitete të tilla kontribuojnë ndjeshëm në promovimin e shkencës dhe në përgatitjen e brezave të rinj për sfidat e së ardhmes.
Sahiti gjithashtu falënderoi nxënësit pjesëmarrës, mësimdhënësit dhe organizatorët për angazhimin dhe përkushtimin e treguar, duke theksuar rëndësinë e bashkëpunimit institucional në avancimin e arsimit shkencor.
Nga komuna e Shtimes, 12 nxënës do të përfaqësojnë komunën në Garat e XXVII-ta Shtetërore të Fizikës 2026, të cilat do të mbahen më 31 janar 2026 në Fakultetin e Shkencave Matematike-Natyrore në Prishtinë, përkatësisht në Departamentin e Fizikës.
Këto gara përbëjnë një hap të rëndësishëm drejt zhvillimit të arsimit cilësor dhe forcimit të kulturës shkencore në mesin e nxënësve të Kosovës.
