Shtime, 26 shtator 2025- Është mbajtur sot mbledhja e IX-të e rregullt e Kuvendit të Komunës së Shtimes, nën udhëheqjen e kryesuesit të Kuvendit, Adnan Ademi.
Në rendin e ditës ishte paraparë shqyrtimi dhe votimi i Planit Buxhetor Komunal 2026-2028, i cili ishte përgatitur pas përfundimit të diskutimit publik dhe që pritej të miratohej në këtë seancë. Ky plan buxhetor, me një shumë prej 11,443,985 euro për vitin 2026, përfaqësonte buxhetin më të madh të planifikuar ndonjëherë për Komunën e Shtimes dhe përfshinte kërkesat e qytetarëve e projekte të rëndësishme zhvillimore për qytetarët tanë.
Megjithatë, me propozim të grupit të asamblistëve të LDK-së, të mbështetur nga asamblistët e PDK-së, si dhe nga Rexhep Gashi dhe Reshat Mujota, kjo pikë u largua nga rendi i ditës. Vendimi u mor me 10 vota për, duke pamundësuar kështu shqyrtimin dhe miratimin e buxhetit të Komunës për vitin 2026.
Pas këtij zhvillimi, mbledhja vazhdoi me shqyrtimin e pikave tjera të rendit të ditës, përfshirë: Ekstrakt-procesverbalin nga mbledhja e mbajtur më 25 gusht 2025, Draft-Rregulloren për Taksa, Tarifa dhe Gjoba për vitin 2026, Propozim-Vendimin për ndarjen e të hyrave të bartura nga viti 2024 në vitin 2025, si dhe raportin periodik për zbatimin e rekomandimeve të Raportit të Auditorit. Për secilën prej këtyre pikave, Drejtori i Financave, Besnik Ahmeti, paraqiti sqarimet e nevojshme.
