Shtime, 28 maj 2025- Në sallën e Kuvendit të Komunës së Shtimes është mbajtur mbledhja e pestë e rregullt për këtë vit, e cila u kryesua nga kryesuesi Adnan Ademi. Në këtë mbledhje ishte i pranishëm edhe kryetari i komunës, Qemajl Aliu.
Pas miratimit të procesverbaleve nga mbledhjet e kaluara, kryesuesi Ademi propozoi një pikë shtesë në rendin e ditës, që kishte të bënte me shfuqizimin e vendimit për planin ndërkomunal për menaxhimin e integruar të mbeturinave për rajonin e Gjilanit dhe Ferizajt, e cila u votua dhe miratua nga asambleistët.
Mbledhja vijoi me shqyrtimin e pikave të parapara në rendin e ditës:
-Draft-Korniza Afatmesme Buxhetore Komunale 2026-2028, e cila u prezantua nga drejtori i financave, Besnik Ahmeti, i cili dha sqarimet e nevojshme rreth dokumentit.
Asambleistët votuan në favor të KAB-it, i cili tashmë do të dërgohet për diskutim publik me qytetarët. Me këtë rast, u bë thirrje për pjesëmarrje aktive të qytetarëve.
-Draft-Plani i punës së ekipit për të drejtat e fëmijëve për periudhën 2025-2027, i cili gjithashtu vjen pas diskutimeve publike dhe u paraqit për miratim në Kuvend.
-Propozim-vendimi për plotësimin e Komitetit për Politikë dhe Financa, për shkak të dorëheqjes së anëtarit Kadri Emini. Në vend të tij u zëvendësua me asambleistin Muhamet Ademaj.
-Informata të përgjithshme nga DKRS- Drejtoresha Albana Fazliu prezantoi të dhënat dhe aktivitetet e fundit të Drejtorisë së Kulturës, Rinisë dhe Sportit.
-Informata nga sektori i bujqësisë i DBPZHR-së, të cilat u paraqitën nga drejtori Gojart Bajrami, me fokus ecurinë e aktiviteteve në këtë sektor.
Mbledhja përfundoi me pikën e fundit të pyetjeve dhe përgjigjeve, ku asambleistët adresuan çështje të ndryshme.
