Shtime, 17 shkurt 2026- Me rastin e 18 vjetorit të shpalljes së Pavarësisë së Republikës së Kosovës, në Kuvendin e Komunës së Shtimes u mbajt seancë solemne, e cila u hap nga kryesuesi i Kuvendit Komunal, Rrahman Jakupi, ku morën pjesë përfaqësues të institucioneve komunale, organizatave të dala nga lufta, familjarë të dëshmorëve, përfaqësues të Policisë së Kosovës, të Bashkësisë Islame, si dhe bashkëpunëtorë e qytetarë.
Në fjalën e tij drejtuar të pranishmëve, nënkryetari i Komunës së Shtimes, Adnan Ademi, theksoi rëndësinë e kësaj date historike, duke u shprehur se 17 Shkurti nuk është vetëm një datë kalendarike, por përmbledh sakrificën dhe përpjekjet e gjeneratave të tëra për liri dhe shtetësi.
“Në këtë ditë, përulemi me nderim të veçantë para dëshmorëve të kombit, para familjeve që sakrifikuan më të dashurit e tyre, para veteranëve, invalidëve dhe luftëtarëve të Ushtrisë Çlirimtare të Kosovës. Kujtojmë me respekt çdo protestues, të burgosur politik, të përndjekur e të torturuar, çdo civil të pafajshëm që dha jetën në rrugën drejt lirisë. Ne si Komunë e Shtimes kemi dhënë kontribut të çmuar në këtë rrugëtim historik dhe do ta ruajmë gjithmonë me krenari kujtesën për secilën sakrificë. Kujtojmë sakrificën heroike të familjes Jashari dhe Masakrën e Reçakut, dhe çdo ngjarje që i parapriu çlirimit dhe shpalljes së Pavarësisë”, tha nënkryetari Ademi.
Ndërkohë, në emër të shoqatave të dala nga lufta e UÇK-së, Muhamet Bilalli uroi qytetarët për festën e Pavarësisë së Kosovës. Pas përfundimit të seancës solemne, përfaqësuesit institucionalë, organizatat e dala nga lufta, veteranët e UÇK-së, familjarët e dëshmorëve dhe qytetarët vazhduan aktivitetet përkujtimore me homazhe në nderim të dëshmorëve dhe heronjve të kombit. Me këtë rast, u vendosën buqeta me lule pranë shtatores së komandantit legjendar Adem Jashari, si dhe u bënë homazhe në varrezat e dëshmorëve në Shtime, Carralevë, Rancë, Reçak dhe Mollopolc. Këto homazhe u realizuan në shenjë respekti dhe mirënjohjeje për sakrificën e të rënëve për liri, duke përkujtuar kontributin e tyre të pazëvendësueshëm në rrugën e shtetndërtimit dhe lirisë së vendit.
