Shtime, 13 shtator 2025- Sot, në 27 vjetorin e rënies heroike, Komuna e Shtimes, përkujton me nderim dhe respekt të thellë dëshmorin e Ushtrisë Çlirimtare të Kosovës, Skënder Zeqir Salihaj nga Mollopolci i Shtimes.
Skënderi, qysh i ri dhe si student, u dallua për angazhimin, përkushtimin dhe vlerat e larta që e karakterizuan. Ai nuk ishte vetëm një djalë i thjeshtë i Mollopolcit, por një idealist i madh, që jetën e tij ia kushtoi lirisë së atdheut. Lufta dhe veprat e tij e bënë të veçantë, deri në momentin e rënies së tij si dëshmor i kombit.
Ishte ndër të parët që iu përgjigj kushtrimit për liri, duke u rreshtuar në radhët e UÇK-së. Veprimtaria e tij në Zonën Operative të Pashtrikut dhe të Nerodimes e shfaqi personalitetin e tij si një luftëtar i guximshëm, gjithmonë i gatshëm për aksione dhe beteja.
Rënia e tij gjatë një aksioni kundër armikut e përjetësoi përgjithmonë emrin e Skënder Salihajt në historinë e lavdishme të luftës sonë çlirimtare.
Skënder Salihaj do të mbetet përherë një shembull frymëzimi për gjeneratat që vijnë, një emër që mishëron sakrificën, trimërinë dhe dashurinë për atdhe.
Lavdi jetës dhe veprës së dëshmorit Skënder Salihaj!
