Shtime, 26 dhjetor 2025- Punimet për rehabilitimin e rrjetit të ujësjellësit në fshatin Pjetërshticë kanë filluar, në kuadër të një projekti me vlerë rreth 400 mijë euro, të financuar nga KRU “Prishtina”. Investim ky që synon zgjidhjen përfundimtare të një problemi të kahershëm dhe sigurimin e furnizimit të qëndrueshëm me ujë për banorët e fshatit.
Kryetari i Komunës së Shtimes, Dr. Qemajl Aliu, tha se realizimi i këtij projekti është rezultat i angazhimit të vazhdueshëm dhe përmbushjes së premtimeve të dhëna.
Kryetari Aliu, gjithash bëri të ditur se punimet tashmë kanë nisur dhe do të vazhdojnë me intensitet të lartë në muajt në vijim, në varësi të kushteve të motit.
“Pas një angazhimi të vazhdueshëm e në përputhje me premtimin e dhënë me përgjegjësi, është nënshkruar kontrata për rregullimin e ujësjellësit të fshatit Pjetërshticë. Punimet kanë filluar dhe do të vazhdojnë me intensitet të lartë në muajt në vijim, sipas kushteve të motit. Ky projekt do t’i jap fund problemit të kahershëm të ujit, duke siguruar furnizim të vazhdueshëm për jetën e përditshme të banorëve”, tha kryetari Aliu, duke shtuar se këto janë vendime në harmoni me zotimet e dhëna dhe investime konkrete që u shërbejnë drejtpërdrejt qytetarëve dhe përmirësimit të cilësisë së jetës së tyre.
