Shtime, 14 dhjetor 2025- Më 14 dhjetor 1998, një nga kapitujt më të lavdishëm të historisë së Kosovës u shkrua me sakrificën sublime të bijve më të mirë të kombit në Betejën heroike të Pashtrikut. Në këtë betejë të përgjakshme të Ushtrisë Çlirimtare të Kosovës, 41 luftëtarë ranë heroikisht në altarin e lirisë, nën udhëheqjen e komandantit Mujë Krasniqi-Kapuçi.
Mes tyre ishin edhe nëntë dëshmorë nga Komuna e Shtimes: Fadil Rashiti, Kadri Ademaj, Ramadan Elshani, Hafir Bajrami, Arben Hyseni, Afrim Musliu, Selim Selimi, Naser Kelmendi dhe Xheladin Xheladini, të cilët me jetën e tyre vulosën përkushtimin ndaj lirisë, dinjitetit dhe idealeve kombëtare.
Me rastin e 27 vjetorit të rënies së tyre, u organizuan homazhe pranë Shtatores së Komandantit Legjendar Adem Jashari, në Varrezat e Dëshmorëve në Shtime, Belinc dhe Kleçkë, si dhe pranë Pllakës Përkujtimore në Pashtrik.
Kryetari i Komunës së Shtimes, dr. Qemajl Aliu, së bashku me bashkëpuntorë, përfaqësues të shoqatave të dala nga lufta e UÇK-së, familjarë të dëshmorëve, përfaqësues institucionalë dhe qytetarë, vendosën buqeta me lule dhe u përkulën me nderim para veprës së tyre.
Dëshmorët e Betejës së Pashtrikut, bij të Komunës së Shtimes dhe të mbarë Kosovës, mbeten simbol i guximit, rezistencës dhe sakrificës për liri. Trimëria dhe vendosmëria e tyre në përballje me forcat serbe do të kujtohen përherë si shembull i pathyeshmërisë së popullit shqiptar dhe si themel i lirisë që gëzojmë sot.
