Shtime 2 tetor 2025- Në fshatin Godanc, u bë sot përurimi i çerdhes më të re në komunën tonë, një institucion i rëndësishëm për edukimin dhe mirëqenien e fëmijëve.
Në këtë ceremoni morën pjesë Kryeministri i Republikës së Kosovës, Albin Kurti, Ministrja e Arsimit, Arbërie Nagavci, Kryetari i Komunës së Shtimes, Dr. Qemajl Aliu, si dhe përfaqësues të institucioneve qendrore e lokale.
Kryeministri Kurti tha se, ky premtim i mbajtur është një mundësi e re për dhjetëra familje e qindra prindër që t’i ndajnë përgjegjësitë me institucionet dhe njëkohësisht të kenë mundësi të profesionalizohen e të aftësohen. “Ndërkohë që edhe fëmijët, përveçse do të mësojnë këtu, do të jenë të shëndetshëm e të sigurt, të rrethuar me përkujdesje, dashuri dhe me përgatitje për nivelet e ardhshme të ngritjes së tyre intelektuale” , tha kryeministri Kurti.
Ndërsa Ministrja e Arsimit, Arbërie Nagavci, tha se imvestimet e bëra në Komunën e Shtimes, po reflektojnë qartë përkushtimin për edukimin dhe mirëqenien e brezave të ardhshëm.
“Sot Shtimes iu shtua edhe një çerdhe e re. Vetëm gjatë këtyre katër viteve, MAShTI ka investuar mbi 4.66 milionë euro në Komunën e Shtimes. Këto investime po reflektojnë qartë përkushtimin tonë për edukimin dhe mirëqenien e brezave të ardhshëm” ,tha ministrja Nagavci.
Kryetari i Komunës së Shtimes, Dr. Qemajl Aliu, u shpreh se ky është një hap i madh drejt përmirësimit të kushteve për fëmijët dhe familjet.
“Është kënaqësi e madhe që sot përuruam çerdhen më të re në Godanc, një hapësirë moderne me standardet më të larta për të vegjlit tanë. Kujdesi ndaj fëmijëve është dhe do të mbetet prioriteti ynë kryesor. Ky institucion nuk është vetëm një objekt i ri, por është një mundësi që 72 familje të kenë mbështetje të konsiderueshme në rritjen dhe kujdesin për fëmijët e tyre. Ne do të vazhdojmë të investojmë në projekte të tilla që u shërbejnë qytetarëve, sepse vetëm kështu ndërtojmë të ardhmen e gjeneratave tona”, tha kryetari Aliu.
Çerdhja e re është ndërtuar me një investim prej 414 mijë euro, duke ofruar një sipërfaqe prej 760 metrash katrorë, me pesë klasa të kompletuara me pajisjet e nevojshme për edukimin e hershëm. Ajo ka gjithsej 72 shtretër për të gjitha grupmoshat, duke mundësuar që një numër i konsiderueshëm fëmijësh të rriten dhe të edukohet në kushte të shëndetshme, të sigurta dhe bashkëkohore.
