Shtime, 25 mars 2025- Në prag të festës së Bajramit, organizata humanitare “Qatar Charity”, në bashkëpunim me Komunën e Shtimes, ka realizuar një aksion bamirësie për të ndihmuar familjet në nevojë në komunën tonë, ku me këtë rast janë shpërndarë 170 pako ushqimore, të cilat u janë dedikuar familjeve më të prekura nga vështirësitë ekonomike.
Përfituesit e këtyre ndihmave janë përzgjedhur nga Qendra për Punë Sociale në Shtime, duke u siguruar që ndihma të shkojë te ata që kanë më shumë nevojë. Gjatë shpërndarjes së pakove ishin të pranishëm edhe nënkryetari i Komunës së Shtimes, Faruk Beqa, drejtoresha për Shëndetësi dhe Mirëqenie Sociale, Mimoza Salihu-Qeriqi dhe bashkëpunëtorë të tjerë, të cilët shprehën mirënjohjen e tyre për këtë iniciativë humanitare dhe theksuan rëndësinë e bashkëpunimit mes institucioneve dhe organizatave bamirëse në mbështetje të familjeve në nevojë.
Përveç kësaj iniciative, edhe marketi “Eli-Ab” në Shtime ka treguar solidaritetin e tij duke shpërndarë 100 pako tjera ushqimore për këto familje, duke dhënë një kontribut të çmuar në këtë festë.
Përmes këtij bashkëpunimi mes sektorit publik, organizatave humanitare dhe sektorit privat, synohet të lehtësohen sadopak sfidat e këtyre familjeve.
