Shtime, 25 qershor 2025- Kryetari i Komunës së Shtimes, Qemajl Aliu, së bashku me kryesuesin e Kuvendit të Komunës, Adnan Ademi, priti sot në takim regjisorin e njohur shqiptar, Fadil Hysaj, të cilit i ndau çmimin e lartë “Nderi i Qytetit” si dhe një mirënjohje të veçantë për kontributin e tij të jashtëzakonshëm në fushën e artit dhe kulturës shqiptare.
“Në një ditë me emocione të veçanta, pata privilegjin që t’i dorëzoj çmimin ‘Nderi i Qytetit’ regjisorit kulminant Fadil Hysaj, si një shenjë modeste mirënjohjeje për veprimtarinë e tij artistike dhe intelektuale, e cila ka lënë gjurmë të pashlyeshme në kulturën tonë”, tha kryetari Aliu, duke shtuar se Fadil Hysaj, djali i Shtimes dhe një nga emrat më të respektuar të artit shqiptar, është një figurë që ka frymëzuar breza të tërë me krijimtarinë e tij, që nga kinemaja e deri te teatri.
“Qyteti ynë nderohet me praninë e tij, e më nderon edhe mua personalisht fakti që sot munda t’i shpreh publikisht mirënjohjen për gjithçka ka bërë e vazhdon të bëjë për artin dhe kulturën shqiptare.
Faleminderit mjeshtër dhe uroj të jetofsh gjatë, për të na dhuruar edhe më shumë art të pastër nga mendja e ndritur që gëzon” tha kryetari Aliu.
Regjisori Fadil Hysaj, i njohur për veprat e tij artistike me peshë, është cilësuar si mjeshtër i kinemasë dhe teatrit, por edhe si një zë i fuqishëm i kujtesës sonë kombëtare dhe një krijues i guximshëm që ka kontribuar në promovimin dhe mbrojtjen e vlerave kombëtare dhe kulturore.
Në këtë takim, përveç çmimit “Nderi i Qytetit”, Hysaj iu dorëzua edhe një mirënjohje për kontributin e tij të çmuar në avancimin e kulturës dhe artit shqiptar.
