Shtime, 26 qershor 2025- Në përvjetorin e 27-të të themelimit të Shtabit të Rancës, një prej pikave më të rëndësishme të historisë sonë të lavdishme, Kryetari i Komunës së Shtimes, Dr. Qemajl Aliu, së bashku me bashkëpunëtorë, përfaqësues institucional, familjarë të dëshmorëve, veteranë të UÇK-së, dhe qytetarë, vizituan këtë vend të shenjtë për historinë e popullit tonë.
Në këtë ditë përkujtimi, u nderua dhe u kujtua kontributi i Rancës si shtabi i parë i UÇK-së në Komunën e Shtimes, i cili ishte pjesë e Zonës Operative të Nerodimës, një ndër qendrat kyçe të organizimit për liri.
“Sot me krenari kujtuam dhe shënuam një prej momenteve më të ndritura të historisë sonë, themelimin e Pikës së Rancës, vendit ku u mblodhën bijtë dhe bijat më të mirë të këtij vendi, dhe aty u shkrua rruga jonë drejt çlirimit”, tha kryetari Aliu, duke bërë të ditur se qeverisja aktuale e Komunës së Shtimes është e vendosur që ky vend historik të ketë pamjen dhe respektin që meriton, duke mos lejuar që historia jonë e lavdishme të mbetet në harresë.
“Që nga dita e parë e qeverisjes sonë, kemi qenë të vendosur që Ranca, e cila ishte lënë anash nga qeverisjet e mëparshme, të marrë pamjen meritore në kujtesën kolektive dhe në respektin institucional. Fillimisht nisëm rregullimin dhe asfaltimin e rrugës që çon deri te Shtabi, projekt që e përmbyllëm me sukses në vitin e dytë të mandatit”, tha kryetari Aliu, duke shtuar se, në përvjetorin e 25-të të themelimit të Shtabit, u përurua rruga dhe u vendos gurthemeli për restaurimin e plotë të kësaj pike historike, ndërsa në vitin e tretë të mandatit Shtabi i Rancës u rikthye në një qendër dinjitoze dhe simbol të qëndrueshmërisë sonë kombëtare.
“Ranca është amanet i atyre që e bënë historinë, dhe ne jemi të përkushtuar që ta çojmë në vend porosinë e tyre, duke investuar në ruajtjen e këtij shtabi, që do të mbetet përherë një fortesë e qëndrueshmërisë sonë kombëtare”, tha kryetari Aliu.
Këtë vit, janë ndarë 50 mijë euro për inventarizimin e Shtabit, ndërsa gjatë verës do të përurohet edhe rruga tjetër që lidh Rancën me fshatin më të madh të komunës, Petrovën, projekt ky me vlerë afro gjysmë milioni euro.
Në total, investimet për infrastrukturën rrugore dhe restaurimin e Shtabit të Rancës kapin vlerën rreth 800 mijë euro.
