Shtime, 30 qershor 2025- Në Shtëpinë e Kulturës në Shtime, sot u dha shfaqja teatrale edukative për fëmijë, prindër, gjyshër, kujdestarë ligjor dhe edukatorë me titullin “Magjia e Leximit”, një aktivitet që solli atmosferë pozitive dhe frymëzuese për të gjithë të pranishmit.
Në këtë ngjarje mori pjesë edhe kryetari i Komunës së Shtimes, dr. Qemajl Aliu dhe drejtoresha për Kulturë, Rini e Sport, Albana Fazliu.
“Leximi është investimi më i mirë që mund t’ia bëjmë brezave të rinj. Është detyra jonë si institucione dhe si prindër të krijojmë sa më shumë hapësira dhe mundësi për fëmijët tanë që të zhvillojnë dashurinë për librin”, tha kryetari Aliu.
Shfaqja, me regji të Iliriana Arifit, solli në skenë një udhëtim të bukur dhe simbolik që rikujtoi vlerën e leximit dhe kohës së kaluar me libra, si pjesë e rëndësishme e zhvillimit të hershëm të fëmijëve.
Ky aktivitet u organizua në bashkëpunim me Drejtorinë e Kulturës në Shtime, në kuadër të projektit, forcimi i cilësisë së shërbimeve të edukimit të fëmijërisë së hershme në Institucionet e EFH-së dhe stimulimit të hershëm në shtëpi për fëmijët e vegjël në Kosovë.
Projekt është mbështetur nga UNICEF, me përkrahje financiare nga Qeveria e Luksemburgut, dhe i implementuar nga Qendra për Shërbime Humane dhe Zhvillim dhe The Library Project Kosova.
