Shtime, 20 mars 2026- Komunës së Shtimes po i shtohet edhe një çerdhe e re, duke shënuar një hap të rëndësishëm në avancimin e edukimit të hershëm. Në fshatin Carralevë, në ambientet e shkollës “Abdullah Shabani”, është bërë inaugurimi i fillimit të punimeve për renovimin dhe adaptimin e hapësirave që do të shërbejnë si çerdhe, investim ky në vlerë rreth 178 mijë euro. Ky projekt përfshin edhe rregullimin e rrethojave dhe parkingut në çerdhen në Muzeqinë.
Në këtë ngjarje morën pjesë kryetari i Komunës së Shtimes, dr. Qemajl Aliu, ministri i Arsimit, Hajrulla Çeku, si dhe ish-ministrja e Arsimit, Arbërie Nagavci.
Sipas kryetarit Aliu, çerdhja do të funksionalizohet përmes adaptimit të një pjese të objektit ekzistues të shkollës, duke shfrytëzuar hapësirat e lira për të kursyer buxhetin dhe për të rritur efikasitetin e investimit. Ai bëri të ditur se projekti parasheh kapacitet për rreth 40 fëmijë dhe punësimin e shtatë punonjësve edukativë.
“Me këtë investim, po i japim zgjidhje të qëndrueshme edukimit parashkollor për fshatin Carralevë, por edhe për Belincin, Pjetërshticën dhe Zborciin. Në të njëjtën kohë, po realizojmë zotimin tonë për ndërtimin e çerdheve në katër anët e komunës, duke përfshirë dy në qytet dhe katër në zonat rurale”, tha kryetari Aliu.
Ai shtoi se, krahas kësaj çerdheje, tashmë janë funksionale çerdhet në fshatrat Muzeqinë, Godanc, dy në Shtime dhe së shpejti edhe në Petrovë, ndërsa me realizimin e këtij projekti edhe Carraleva po bëhet pjesë e rrjetit të institucioneve parashkollore në komunë.
Ministri i Arsimit, Hajrulla Çeku, e vlerësoi këtë investim si të rëndësishëm për përmirësimin e infrastrukturës arsimore dhe për rritjen e cilësisë në edukimin e hershëm.
“Ky projekt është dëshmi e vazhdimit të përkushtimit institucional për modernizimin e arsimit. Punët e mira do të vazhdojnë dhe do të intensifikohen, në mënyrë që fëmijët të kenë kushte sa më të mira për zhvillim dhe mësim”, theksoi Çeku.
Ndërkaq, ish-ministrja Arbërie Nagavci nënvizoi rëndësinë e bashkëpunimit ndërinstitucional dhe prioritetin që i është dhënë edukimit të hershëm.
“Angazhimi për krijimin e hapësirave të reja për fëmijët po vazhdon me të njëjtin intensitet. Në komunat ku ka bashkëpunim dhe përkushtim, si në Shtime, synimi për përfshirjen e të gjithë fëmijëve në edukimin e hershëm po bëhet realitet”, u shpreh ajo.
Objekti i çerdhes do të ketë një sipërfaqe prej rreth 490 metra katrorë, me tri hapësira të organizuara për fëmijët e moshës parashkollore, duke krijuar kushte moderne dhe të përshtatshme për zhvillimin e tyre.
Sipas planifikimeve, punimet pritet të përfundojnë deri më 30 dhjetor të këtij viti, duke u ofruar fëmijëve të Carralevës dhe fshatrave përreth një ambient të sigurt dhe cilësor për edukimin e hershëm.
