Shtime, 20 shkurt 2026- Kompanitë “PEMA” dhe “Hamilton”, në bashkëpunim me Drejtorinë Komunale të Arsimit në Shtime, kanë organizuar sot në ambientet e shkollës fillore “Emin Duraku” në Shtime Garën Komunale “Spelling Bee”, një aktivitet arsimor që po shndërrohet në traditë dhe po merr vëmendje gjithnjë e më të madhe në nivel lokal dhe kombëtar.
Në këtë garë morën pjesë nxënës të talentuar nga disa shkolla të komunës së Shtimes, të cilët garuan në drejtshkrimin e fjalëve në gjuhën angleze, duke dëshmuar përgatitje, përkushtim dhe njohuri të thella gjuhësore.
Shkollat pjesëmarrëse në këtë aktivitet ishin: ShFMU “Skenderbeu”-Reçak, ShFMU “Bajram Curri”-Petrovë, ShFMU “Emin Duraku”-Shtime, ShFMU “Idriz Ajeti”-Pjetershticë, ShFMU “Lasgush Poradeci”-Muzeqinë, ShFMU “Hasan Prishtina”-Godanc, Institucioni i Arsimit dhe Aftësimit Profesional (IAAP)-Shtime.
Atmosfera në shkollë ishte entuziaste dhe motivuese, ku nxënësit u përballën me sfida të ndryshme gjuhësore, ndërsa mësimdhënësit dhe prindërit i mbështetën me krenari.
Gara u zhvillua në disa raunde, ku pjesëmarrësit duhej të shqiptonin saktë dhe me vetëbesim fjalët e përzgjedhura nga juria profesionale.
Ky është viti i dytë radhazi që një garë e tillë organizohet në Kosovë, me qëllim të promovimit të gjuhës angleze, zhvillimit të shkathtësive komunikuese dhe drejtshkrimore te nxënësit, si dhe nxitjes së konkurrencës së shëndetshme dhe pozitive në mesin e tyre.
Organizatorët theksuan se aktivitete të tilla ndikojnë drejtpërdrejt në rritjen e cilësisë së arsimit dhe në motivimin e nxënësve për të arritur rezultate sa më të larta.
Nxënësit që arritën të kualifikohen nga gara komunale do të avancojnë në finalen kombëtare, e cila do të organizohet në Prishtinë. Në këtë fazë ata do të përballen me nxënës nga komunat e tjera të Kosovës, duke përfaqësuar me dinjitet shkollat dhe komunën e tyre. Po ashtu, nxënësit më të suksesshëm nga të gjitha komunat do të kenë mundësinë të përfaqësojnë Kosovën në gara ndërkombëtare të gjuhës angleze, të cilat do të organizohen online ose fizikisht, varësisht nga formati i garës. Kjo përbën një mundësi të jashtëzakonshme për të rinjtë që të sfidojnë veten në një nivel më të lartë dhe të krijojnë përvoja të reja akademike e kulturore.
Organizimi i Garës “Spelling Bee” dëshmon përkushtimin e institucioneve arsimore dhe partnerëve mbështetës për të investuar në edukimin dhe zhvillimin e brezit të ri, duke i pajisur ata me njohuri dhe aftësi që do t’u shërbejnë në të ardhmen akademike dhe profesionale.
