Shtime, 2 gusht 2025- Komuna e Shtimes po vazhdon të investojë në sport dhe në të ardhmen e të rinjve. Një tjetër hap i rëndësishëm në drejtim të përmirësimit të infrastrukturës sportive, u bë edhe dje me nënshkrimin e një memorandumi bashkëpunimi për ndërtimin e stadiumit të ri të qytetit, në vlerë prej mbi 310 mijë euro.
Memorandumi u nënshkrua nga kryetari i Komunës së Shtimes, Dr. Qemajl Aliu, dhe kryetari i Federatës së Futbollit të Kosovës, Agim Ademi.
“Pas përfundimit të stadiumit kryesor modern, që shumë shpejt do ta përurojmë me qytetarët tanë, tani po hapim një kapitull të ri me ndërtimin e stadiumit ndihmës. Është një lajm i jashtëzakonshëm për të gjithë sportdashësit dhe të rinjtë që duan të zhvillohen në një ambient profesional”, tha kryetari Aliu.
Stadiumi i ri do të ndërtohet në vendin e stadiumit historik të Lagjes së Pajtimit, një hapësirë që ruan kujtime të çmuara për breza të tërë sportistësh dhe tifozësh.
“Me këtë investim, Shtimja po shndërrohet në epiqendër të sportit. Falënderoj Kryetarin Ademi për përkrahjen dhe partneritetin në këtë projekt kaq domethënës për komunën tonë”, tha kryetari Aliu.
Punimet pritet të nisin shumë shpejt dhe do të realizohen në bashkëpunim me Federatën e Futbollit të Kosovës.
