Shtime, 25 dhjetor 2025- Stadiumi i Qytetit në Shtime nga sot ka marrë një pamje tërësisht të re, me tribuna moderne dhe fushë tashmë të rregulluar sipas standardeve, falë një investimi nga Qeveria e Kosovës prej rreth 2.5 milionë eurosh, i realizuar brenda një periudhe njëvjeçare e gjysmë.
I pranishem në përurim ishte edhe Kryeministri i Republikës së Kosovës, Albin Kurti, Ministri i Kulturës, Rinisë e Sportit Hajrullah Çeku, kryetari i Komunës së Shtimes Dr. Qemajl Aliu, bashkepunëtorë, sportdashës e qytetarë.
Kryeministri Kurti, tha se rindërtimi i stadiumit përfaqëson një vlerë të madhe për sportistët dhe sportdashësit.
“Në këtë stadium i cili është rindërtuar dhe me rreth 2.5 milionë euro për 1 vit e gjysmë është krijuar kjo mrekulli për sportistët, sportin, shikuesit, futbolldashësit për të gjitha moshat. E gëzofshi dhe klubit futbollistik ‘Vjosa’ i dëshirojmë suksese gjithnjë e më shumë në të ardhmen”, tha kryeministri Kurti.
Ndërsa, Ministri i Kulturës, Rinisë dhe Sportit, Hajrulla Çeku, tha se stadiumi tashmë i plotëson kushtet për zhvillimin e ndeshjeve profesionale.
“Besoj që këtu është arritur një standard çfarë kërkohet për t’i zhvilluar ndeshjet profesionale zyrtare. Ky stadium i transformuar tashmë i plotëson kushtet në shërbim të futbollistëve dhe të publikut. Vazhdojmë edhe me shumë investime tjera gjithandej Kosovës”, tha ministri Çeku.
Kryetari i Komunës së Shtimes, Qemajl Aliu, e cilësoi këtë projekt si veprën më të madhe të realizuar në komunë.
“Ky investim i jep dinjitet sportit tonë lokal dhe hap perspektivë të re për të rinjtë tanë.
Projekti në vlerë afro 2,5 milionë euro ka filluar në mars 2024 dhe përfundoi tani para vitit 2026.
Punimet cilësore kanë përfshirë ndërtimin e tribunave të reja të 1205 ulëseve, zhveshtoreve dhe objekteve përcjellëse.
Ne besojmë ne talentin e sportistëva tanë dhe investojmë për ta. Bëjmë punë konkrete dhe nuk ndalemi së punuari e njëkohësisht falënderoj ministrin dhe kryeministrin për kujdesin dhe vëmendjen që kanë për Shtimen dhe qytetarët”, tha kryetari Aliu.
Rindërtimi i stadiumit është pjesë e investimeve publike për avancimin e infrastrukturës sportive në Kosovë dhe pritet të shërbejë për klubin futbollistik “Vjosa”, si dhe për aktivitete të tjera sportive.
