Shtime, 9 mars 2025- Kryetari i Komunës së Shtimes, Qemajl Aliu, së bashku me delegacionin e tij dhe me ftesë të qytetarit të nderit të Komunës së Shtimes, Hartmut Ganzke, po qëndrojnë për vizitë në Gjermani. Në këtë udhëtim të rëndësishëm po marrin pjesë edhe përfaqësueset e Klubit të Volejbollit “Vjosa”, duke e kthyer këtë vizitë në një ngjarje të rëndësishme kulturore dhe sportive.
Kryetari i Komunës së Shtimes, Qemajl Aliu, gjatë kësaj vizite shprehu mirënjohjen e tij për pritjen e ngrohtë të treguar nga nikoqirët gjermanë.
“Është një mundësi dhe një dëshmi e miqësisë së fortë që kemi ndërtuar me partnerët tanë në Qarkun Unna. Jemi të bindur se ky është vetëm fillimi i një rruge të gjatë suksesi dhe bashkëpunimi.
Faleminderit posaçërisht qytetarit të nderit të Komunës së Shtimes, Hartmut Ganzke, MdL, kryetarit të Qarkut Unna, Mario Löhr dhe zyrtarit të Qarkut Unna e asambleistit, Arber Aliu për mikpritjen dhe entuziazmin e tyre sa i përket raportit mes vendeve tona.”, tha kryetari Aliu.
Kjo vizitë përfaqëson një mundësi të veçantë për të forcuar lidhjet mes Komunës së Shtimes dhe Qarkut Unna, si pjesë e bashkëpunimit të vazhdueshëm mes dy vendeve.
Gjatë qëndrimit në Gjermani, delegacioni nga Shtimja do të marrë pjesë në një sërë aktivitetesh që synojnë shkëmbimin e përvojave kulturore dhe sportive.
Një moment i rëndësishëm i kësaj vizite do të jenë dy ndeshjet miqësore të volejbollit, ku vajzat e Klubit “Vjosa” do të sfidojnë ekipet vendase, EVC Massen dhe GSV Fröndenberg. Këto takime sportive jo vetëm që do të shërbejnë si një përvojë e vlefshme për sportistet e reja, por edhe si një festë e miqësisë dhe bashkëpunimit ndërkombëtar.
Kjo vizitë është dëshmi e qartë e rëndësisë që ka bashkëpunimi ndërmjet qyteteve dhe popujve përmes sportit dhe kulturës, duke krijuar ura miqësie dhe mundësi të reja për brezat e rinj.
