Shtime, 16 shkurt 2026- Në sallën e Kuvendit të Komunës së Shtimes, nën patronatin e kryetarit të komunës, Dr. Qemajl Aliu, u mbajt ceremonia e shpalljes së laureatëve të sportit për vitin 2025. Ky aktivitet u organizua në kuadër të festimeve për 17 Shkurtin, Ditën e Pavarësisë së Kosovës, duke bashkuar sportistë, trajnerë, drejtues klubesh dhe dashamirë të sportit.
Në ceremoninë e ndarjes së çmimeve mori pjesë edhe nënkryetari i komunës, Adnan Ademi, i cili theksoi rëndësinë e sportit dhe vlerësoi arritjet e sportistëve gjatë vitit që lamë pas.
“Sot nuk jemi mbledhur vetëm për të ndarë çmime, por për të festuar punën dhe shpirtin garues që e ka karakterizuar sportin në komunën tonë gjatë vitit 2025. Ju sportistë jeni krenaria jonë, sepse me përkushtim dhe disiplinë keni ngritur lart emrin e komunës sonë dhe po frymëzoni gjeneratat e reja të besojnë në ëndrrat e tyre. Mbështetja për sportin do të vazhdojë edhe më fuqishëm, sepse sporti ndërton karakter, disiplinë dhe një shoqëri më të shëndetshme”, tha nënkryetari Ademi.
Viti 2025 u vlerësua si një vit i suksesshëm për sportin shtimjan, ku klubet dhe sportistët e komunës dëshmuan se puna dhe angazhimi i vazhdueshëm sjellin rezultate dhe suksese të rëndësishme.
Gjatë ceremonisë u ndanë mirënjohje për veteranët e sportit: Sejdi Beha dhe Faruk Beqa si ish-futbollistë, si dhe Ridvan Januzi dhe Tafë Iballi si ish-hendbollistë, për kontributin e tyre ndër vite në zhvillimin e sportit lokal.
Mirënjohje për kontribut në zhvillimin e sportit iu ndanë gjithashtu Ismet Salihajt, Shoqatës së Sportit Shkollor, si dhe mirënjohje post-mortem për ish-hendbollistin Remzi Iballi.
Në kategorinë e kadetëve, u vlerësuan sportistët me rezultate të dalluara: Riga Duraku nga Klubi i Hendbollit “Vjosa”, Alhena Shaqiri nga Klubi i Volejbollit “Vjosa” dhe Ardian Muhadini nga Klubi i Futbollit “Vjosa”.
Në kategorinë e juniorëve, mirënjohje u ndanë për volejbollisten Anesa Nuha dhe hendbollisten Denisa Rexhepi nga klubet “Vjosa”, për arritjet e tyre gjatë vitit.
Ceremonia vlerësoi gjithashtu kontributin e trajnerëve dhe punëtorëve sportivë. Eliza Imeri u shpall trajnerja më e suksesshme për të rinj në vitin 2025, Alban Iballi trajneri më i suksesshëm në kategorinë e seniorëve, ndërsa Arsim Imeri u vlerësua si punëtori sportiv më i dalluar i vitit.
Klubi i Futsallit “Shtimja 26” u shpall klubi më i suksesshëm për vitin 2025, ndërsa Klubi i Hendbollit Femrat “Vjosa” u vlerësua si skuadra më e suksesshme në kategorinë e pionierëve.
Ndër sportistet e dalluara u vlerësua edhe Fatime Beha, për paraqitjet e suksesshme me Kombëtaren U17 dhe Kombëtaren A të Kosovës, si dhe teniserja Anesa Ismajli, e cila ka përfaqësuar Kosovën në gara kombëtare dhe ndërkombëtare.
Në kategorinë e seniorëve-femrat, çmimet iu ndanë Sara Ramadanit nga KVF “Vjosa” dhe Anita Imerit nga KHF “Vjosa”, ndërsa në kategorinë e seniorëve-meshkujt u vlerësuan Kushtrim Tershani nga Klubi i Motocrossit “Vjosa”, Bislim Emini nga Klubi i Futsallit “Shtimja 26” dhe Imer Salihaj nga Klubi i Motocrossit.
Titulli i sportistit më të suksesshëm të vitit 2025 iu nda Halit Rexhajt nga Klubi i Motocrossit “Vjosa”, për përfaqësimin e suksesshëm të komunës dhe Kosovës në gara kombëtare dhe ndërkombëtare, duke arritur rezultate kulminante gjatë vitit.
Procesi i përzgjedhjes së laureatëve u realizua në bazë të aplikimeve të paraqitura nga klubet dhe individët, sipas konkursit të hapur për vlerësimin e sportistëve më të suksesshëm të vitit, ndërsa vlerësimi përfundimtar u bë nga komisioni përkatës i kryesuar nga Iliriana Arifi, i cili shqyrtoi arritjet dhe kontributin e secilit kandidat gjatë vitit 2025.
