Shtime, 27 korrik 2026- Për tre ditë me radhë, nga 24 deri më 26 korrik, qielli mbi fshatin Vojnoc u mbush me fluturime, adrenalinë dhe aktivitete atraktive, ku u mbajt me sukses AEROFEST 2026, i organizuar nga Aerofest Kosova. Ky festival mblodhi pilotë dhe pjesëmarrës nga Kosova, Ballkani dhe vende të ndryshme të Evropës, duke sjellë demonstrime me paramotorë, aeroplanë të vegjël, deltaplanë, motomeeting, kamping dhe aktivitete të tjera që zgjuan interesimin e mijëra vizitorëve.
Për ta parë nga afër këtë ngjarje të veçantë ishte i pranishëm edhe Kryetari i Komunës së Shtimes, dr. Qemajl Aliu, i cili përjetoi emocionet e festivalit duke shijuar edhe një fluturim. Me këtë rast, ai vlerësoi organizimin dhe rëndësinë që ngjarje të tilla kanë për promovimin e sportit, turizmit dhe potencialeve të komunës.
“Mbështetja për aktivitete të tilla që promovojnë sportin, natyrën dhe kampingun është gjithmonë prioriteti ynë. Përgëzime të përzemërta Aerofest Kosova për punën e shkëlqyer në organizimin e demonstrimeve ajrore dhe motomeeting-ut. Faleminderit të gjithëve që e kthyen vëmendjen nga Shtimja gjatë këtyre tri ditëve. Shihemi në edicionet e radhës”, tha kryetari Aliu.
Gjatë festivalit, fluturimet dhe aktivitetet në qiell u shndërruan në atraksionin kryesor, ndërsa pjesëmarrësit dhe vizitorët patën mundësinë të përjetojnë nga afër emocionet që ofrojnë sportet ajrore.
Organizimi i këtij eventi e promovoi fshatin Vojnoc si një destinacion të përshtatshëm për aktivitete ajrore dhe rekreative, duke i dhënë zonës një atmosferë të veçantë dhe duke e vendosur Shtimen në qendër të vëmendjes për tri ditë radhazi.
