Shtime, 26 korrik 2026- Në 28 vjetorin e shënimit të Ditës së Dëshmorëve të Komunës së Shtimes, në Shtëpinë e Kulturës u mbajt Akademia Përkujtimore. I pranishëm ishte kryetari i Komunës së Shtimes dr. Qemajl Aliu së bashku deputetët e Kuvendit të Kosovës, komandantin e Zonës së Nerodimes, z. Shukri Buja, bashkëpuntorë, familjarë të dëshmorëve, përfaqësues institucionalë, veteranë e invalidë të luftës, përfaqësues të Organizatave të Dala nga Lufta e UÇK-së dhe qytetarë të shumtë.
Në fjalën e tij, kryetari i Komunës së Shtimes, Dr. Qemajl Aliu, tha se 26 Korriku është një nga datat më të rëndësishme në historinë e komunës, një ditë që simbolizon sakrificën më
sublime për lirinë e vendit.
Fjalimi i plotë i kryetarit Aliu:
“Të nderuara familje të dëshmorëve, martirëve dhe të të rënëve për liri,
Të nderuar invalidë dhe veteranë të Ushtrisë Çlirimtare të Kosovës.
I nderuar komandant i Zonës së Nerodimës, z. Shukri Buja.
I nderuar z. Isak Musliu-komandant Cerqizi,
Të nderuar deputetë të Kuvendit të Republikës së Kosovës,
Shqipe Selimi, Gani Krasniqi, Ilir Qeriqi.
I nderuar Drejtor i Agjencisë për Memoriale, z. Imer Hakaj.
Të nderuar përfaqësues të shoqatave të dala nga lufta e lavdishme e UÇK-së, Baca Isak, Baca Muhamet, Baki.
Të nderuar përfaqësues të institucioneve lokale dhe qendrore.
Mysafirë të nderuar,
Të nderuar të pranishëm, motra dhe vëllezër, zonja dhe zotërinj,
Ka data që janë aq të veçanta e aq madhështore, sa nuk mund të harrohen kurrë.
Për ne, komunën e Shtimes, padyshim 26 korriku është njëra prej tyre.
Nderi më i madh i jetës sonë është mundësia për t’i nderuar thellësisht bijtë dhe bijat më të mirë të këtij vendi, dëshmorët tanë, ata që dhanë jetën për lirinë që ne sot e gëzojmë.
Ata janë heronjtë e vërtetë të historisë sonë. Jo heronj të legjendave e të përrallave, por njerëz të mishit e të gjakut, që dolën nga shtëpitë e tyre, u larguan nga fëmijët dhe familjet e tyre, për t’u përballur me një ushtri fashiste, të armatosur deri në dhëmbë.
Vetëm dëshmorët e kanë përmbushur detyrën e tyre plotësisht ndaj atdheut, në mënyrën më të plotë që mund ta bëjë njeriu, duke dhënë më të shtrenjtën, më sublimen, jetën e tyre. E neve, të gjallëve, na mbetet ta vazhdojmë atë që ata e filluan: ta ruajmë, ta forcojmë dhe ta meritojmë çdo ditë lirinë që na e lanë amanet.
Veçanërisht këtë datë e madhështon dëshmori i parë i komunës sonë, Ruzhdi Salihu, i rënë si sot 28 vite më parë, i njohur në radhët e UÇK-së me pseudonimin “Palloshka”. Historia e tij flet për një njeri që, pasi kaloi vetë nëpër dhunën e policisë serbe, vendosi të mos i shmanget luftës, por të jetë në ballë të saj.
Sot, përveç Ruzhdiut dhe të gjithë dëshmorëve të rënë, është momenti ta kujtojmë edhe Sadik Mujotën-Malësorin, dëshmorin e kombit, i cili u flijua bashkë me bijën e tij, Hanumshahen, pikërisht në Reçakun martir e heroik. Babë e bijë, të bashkuar deri në çastin e fundit, dhanë jetën për idealin e Kosovës së lirë.
Në historinë e luftës sonë, pak simbole flasin aq fort sa ky: kur lufta prek edhe fëmijët, kur sakrifica bëhet familjare, kuptojmë deri ku shkoi çmimi i lirisë sonë.
Familja Mujota dha një kontribut të madh në luftën për liri, duke i rreshtuar djemtë dhe vajzat e saj ndër më të guximshmit në përballjen me forcat serbe, me qëllim të çlirimit të trojeve tona nga regjimi serb.
Vlen të theksohet edhe kontributi i njërit prej djemve të kësaj familjeje të nderuar, ish-kryetarit dhe ish-ministrit, z. Fehmi Mujota, i cili shërbeu si epror për Moral dhe Politikë në Komandën e Zonës Operative të Nerodimës. Ai pati një rol të rëndësishëm në koordinimin e bashkëpunimit ndërmjet strukturave të UÇK-së dhe Misionit Verifikues Ndërkombëtar lidhur me Masakrën e Reçakut, duke kontribuar në zbardhjen e së vërtetës dhe mbrojtjen e kauzës së drejtë të popullit të Kosovës.
Nga Ruzhdi Salihu, Sadik e Hanumshahe Mujota e deri te çdo dëshmor tjetër i komunës sonë që dha jetën për liri, secili prej tyre është shembulli më i lartë i dashurisë për atdheun. Emrat dhe flijimi i tyre mbeten përgjithmonë të skalitur në kujtesën tonë kombëtare.
Ata janë e do të mbeten gjithmonë drita dhe ideali që do ta frymëzojë çdo brez nëpër shekuj.
Të nderuar të pranishëm,
Jam i lumtur që, pikërisht sot, në këtë ditë të veçantë përkujtimi, përfunduam edhe punimet për rregullimin e Varrezave të Dëshmorëve. Bëhet fjalë për investimin prej 430 mijë eurosh, të mbështetur nga Ministria e Kulturës dhe nga Agjencia për Menaxhimin e Komplekseve Memoriale të Kosovës.
Kujdesi ndaj dëshmorëve është obligim moral, kombëtar dhe institucional. Kur i nderojmë ata siç e meritojnë, forcojmë edhe përgjegjësinë tonë për ta ruajtur lirinë që na kushtoi aq shtrenjtë.
Le të vazhdojmë të punojmë së bashku për një shoqëri dhe një shtet ku çdo qytetar e gëzon plotësisht lirinë dhe dinjitetin për të cilin luftuan e ranë dëshmorët tanë.
Le t’ua dëshmojmë atyre se sakrifica e tyre nuk shkoi kot.
Kjo është mënyra më e mirë për t’ua kthyer sadopak atë që na dhanë.
Lavdi e përhershme dëshmorëve dhe martirëve të kombit e të Shtimes!
Nderim për familjet e tyre, që bartin këtë kujtesë çdo ditë të jetës së tyre.
Mirënjohje e pafund për të gjithë veprimtarët e çështjes kombëtare ndër breza, luftëtarët, veteranët dhe invalidët e Luftës së Ushtrisë Çlirimtare, që sot janë mes nesh si dëshmi e gjallë e sakrificës sonë kombëtare.
Ju faleminderit shumë”, e mbylli fjalimin kryetari i Komunës së Shtimes, dr. Qemajl Aliu.
Me fjalë rasti në akademi u drejtuan edhe komandanti i Zonës Operative të Nerodimës, Shukri Buja, si dhe përfaqësuesi i Organizatave të Dala nga Lufta e UÇK-së, Dega në Shtime, Muhamet Bilalli. Ata vlerësuan lart luftën çlirimtare, heroizmin dhe sakrificën e luftëtarëve të UÇK-së, duke theksuar se vlerat e luftës çlirimtare dhe amaneti i dëshmorëve duhet të ruhen e të përcillen me krenari te brezat e rinj.
Në kuadër të akademisë u shfaq edhe dokumentari kushtuar Dëshmorit të Kombit, Sadik Mujota, ndërsa Kori i Qytetit, me interpretimet e tij artistike, i dha ceremonisë një atmosferë të veçantë emocionale dhe dinjitoz.
